23 اگست ، 2023 
عمران خان کی بشریٰ بی بی سے شادی کی خواہش پر حیران تھا مگر کچھ کہہ نہ سکا: عون چوہدری
23 اگست ، 2023
چیئرمین پی ٹی آئی عمران خان کے سابق قریبی ساتھی عون چوہدری کا کہنا ہے کہ عمران خان کی بشریٰ بی بی سے شادی کی خواہش کا سن کر حیران رہ گیا تھا لیکن ان سے 15 سے 20 سال چھوٹا تھا لہٰذا کچھ نہ کہہ سکا۔
جیو نیوز کے پروگرام ’ ایک دن جیو کے ساتھ‘ میں میزبان سہیل وڑائچ کے سوال پر عون چوہدری نے عمران خان کی بشریٰ بی بی سے شادی کی خواہش کے بارے میں بتایا۔
انہوں نے کہا کہ ’میں عمران خان کا ایک وفادار ساتھی تھا، انہوں نے مجھے بطور فیملی ممبر اور اچھا دوست سمجھا لیکن انہوں نے مجھے جب بتایا کہ وہ بشریٰ بی بی سے شادی کرنا چاہتے ہیں تو مجھے حیرانی ہوئی، میں نے ان سے سوال کیا کہ کیا وہ خوش ہیں؟ تو انہوں نے کہا کہ جی !، اس کے بعد میں دونوں کی شادی میں بطور گواہ شریک ہوا‘۔
عون چوہدری نے کہا کہ ’عمران خان کے ہمراہ وہ شادی سے قبل بھی بشریٰ بی بی سے کئی بار مل چکے تھے، وہ بنی گالہ میں رہتی نہیں تھیں لیکن عمرا ن خان شادی سے قبل بشریٰ بی بی سے ملتے رہے ہیں، وہ کہتے تھے کہ میرا بشریٰ سے تعلق روحانیت کے حوالے سے ہے، عمران خان اس وقت ڈسٹرب تھے‘۔
انہوں نے بتایا کہ ’اس کے بعد میں انہیں کیا کہتا کیوں کہ عمران خان 62 سے 65 سال کے ہیں اور میں ان سے 15 سے 20 سال چھوٹا ہوں، ان سے کئی سال چھوٹا ہوتے ہوئے کیسے یہ کہہ سکتا تھا کہ اپنی زندگی کا یہ فیصلہ نہ کریں‘۔
عمران خان کی سابقہ اہلیہ ریحام خان سے شادی اور پھر طلاق سے متعلق بات کرتے ہوئے عون چوہدری کا کہنا تھا کہ ’یہ فیصلہ بھی عمران خان کا تھا، انہوں نے مجھ سے کہا تھا کہ مجھے شادی کرنی ہے تو میں نے کہا اگر وہ آپ کیلئے اچھی ثابت ہوسکتی ہں تو آپ بسم اللہ کریں‘۔
