25 اگست ، 2023 
افغانستان کیخلاف شاندار فتح، نسیم کو سنسنی خیز میچز میں کس چیز کا خطرہ رہتا ہے؟
25 اگست ، 2023
افغانستان کے خلاف میچ میں قومی ٹیم کی جیت میں اہم کردار ادا کرنے والے نوجوان فاسٹ بولر نسیم شاہ کا کہنا ہے کہ سنسنی خیز میچز میں آخر میں بیٹنگ سے مجھے ہارٹ اٹیک کا خطرہ رہتا ہے۔
گزشتہ روز کھیلے گئے ایک روزہ میچ میں پاکستان نے افغانستان کو سنسنی خیز مقابلے کے بعد ایک وکٹ سے شکست دی تھی۔
میچ کے بعد انٹرویو دیتے ہوئے نسیم شاہ کا کہنا تھا اس سال جتنی بار آخر میں میری بیٹنگ آئی ہے، خدانخواستہ مجھے ہارٹ اٹیک نہ ہو جائے کسی دن۔
نسیم شاہ کا کہنا تھا اس جیت پر اللہ کا جتنا شکر ادا کیا جائے کم ہے، میں ہمیشہ کوشش کرتا ہوں اور مشکل صورتحال میں خود پر یقین رکھتا ہوں۔
ان کا کہنا تھا جب میں کھیلنے گیا تو اس وقت شاداب کریز پر تھے اور مجھے یقین تھا کہ وہ میچ ختم کریں گے لیکن ان کے آؤٹ ہونے کے بعد میرے دل میں آیا کہ اب سب کچھ میرے اوپر ہے اور بولر بھی وہی ہے، بہت خوشی کی بات ہے کہ ہم جیت گئے اور ہمیں اس جیت کی بہت ضرورت بھی تھی۔
نسیم شاہ کا کہنا تھا میں نیٹ میں بھی بیٹنگ کی بہت پریکٹس کرتا ہوں کیونکہ مجھے مشکل صورتحال میں بیٹنگ ملتی ہے اور گراؤنڈ میں صرف کوشش کرتا ہوں جو میرے ہاتھ میں ہے، عزت دینے والی اللہ کی ذات ہے۔
فاسٹ بولر کا کہنا تھا پریشر صورتحال میں خود کو پرسکون رکھنا بہت مشکل ہوتا ہے لیکن میں یہی کوشش کرتا ہوں کہ جو میرے ہاتھ میں ہے وہ کروں، باقی اللہ مدد کرتا ہے۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
