کھیل

پاکستان اور جنوبی افریقا کی ویمن کرکٹ سیریز کی ٹرافی کی رونمائی

31 اگست ، 2023

پاکستان اور جنوبی افریقا کی ویمن کرکٹ ٹیموں کے درمیان تین ٹی ٹوئنٹی میچز کی سیریز کی ٹرافی کی رونمائی کردی گئی، سیریز جمعہ سے کراچی میں شروع ہوگی۔

سیریز کے آغاز سے قبل پاکستان کی کپتان ندا ڈار اور جنوبی افریقی کپتان لارا وولوارڈ نے ٹرافی کی رونمائی کی۔

ٹرافی کی رونمائی کے موقع پر میڈیا سے گفتگو کرتے ہوئے پاکستانی ٹیم کی کپتان ندا ڈار نے کہا کہ ٹیم کی ہر کھلاڑی اہم ہے، جنوبی افریقا مشکل حریف ضرور ہے لیکن پاکستان نے اس سے کھیلنے کی بھرپور تیاری کی ہے۔

ندا ڈار کا کہنا تھا کہ پاکستان ویمن ٹیم ماڈرن ڈے کرکٹ کی تقاضے پورے کرتے ہوئے ٹی ٹوئنٹی سیریز میں جارح مزاجی کا مظاہرہ کرے گی کیونکہ اگر پلیئرز مثبت سوچ کے ساتھ میدان میں جائیں تو نتائج ضرور ملتے ہیں۔

جنوبی افریقی ویمن ٹیم کی کپتان کا کہنا تھا کہ پاکستان اچھی ٹیم ہے اور اس کے پاس کچھ ایسی کھلاڑی ہیں جو میچ کا پانسہ پلٹ سکتی ہیں۔

انہوں نے کہا کہ پاور پلے کا بہتر استعمال کرکے پاکستان کو دباؤ میں لینے کی کوشش کریں گی، سیریز میں اچھے میچز کی توقع ہے۔

یاد رہے کہ لارا وولوارڈ کی قیادت میں جنوبی افریقی ویمن کرکٹ ٹیم پہلی مرتبہ پاکستان میں کوئی سیریز کھیلے گی۔

یہ بھی یاد رہے کہ تین ٹی ٹوئنٹی میچز کی سیریز کا پہلا میچ جمعہ کو نیشنل بینک کرکٹ ایرینا میں ہوگا جس کیلئے دونوں ٹیموں نے بھرپور تیاریاں کرلی ہیں جبکہ ٹی ٹوئنٹی میچز کے بعد دونوں ٹیمیں ون ڈے سیریز میں بھی مدمقابل ہوں گی۔