02 اکتوبر ، 2023 
ملتان ائیرپورٹ سے عمرےکی آڑ میں سعودی عرب جانیوالے 16 بھکاری گرفتار
02 اکتوبر ، 2023
وفاقی تحقیقاتی ایجنسی (ایف آئی اے) امیگریشن نے ملتان ائیرپورٹ پرکارروائی کرتے ہوئے عمرےکی آڑ میں سعودی عرب جانے والے 16 بھکاریوں کو گرفتار کرلیا۔
ترجمان ایف آئی اے کے مطابق ملتان ائیرپورٹ پر امیگریشن کے دوران معلوم ہوا کہ مسافر بھیک مانگنےکے لیے عمرہ ویزا پر سعودی عرب جا رہے ہیں، ان کے ساتھ ایک بچہ بھی سفر کر رہا تھا۔
دوران تفتیش مسافروں نے انکشاف کیا کہ وہ سعودی عرب بھیک مانگنےکی غرض سے جا رہے ہیں، مسافروں کو سعودی عرب پہنچنے پر پاکستانی ایجنٹوں نے وصول کرنا تھا۔
مسافروں نے مزید انکشاف کیا کہ بھیک کی حاصل کردہ آدھی رقم سب ایجنٹ کے حوالے کر نی تھی، عمرہ ویزے کی مدت پوری ہونے کے بعد مسافروں نے واپس پاکستان آنا تھا۔
مسافروں کو مزید جانچ پڑتال اور قانونی کارروائی کے لیے ایف آئی اے کمپوزیٹ سرکل ملتان منتقل کر دیا گیا ہے۔
گزشتہ دنوں سیکرٹری اوور سیز پاکستانیز نے سینیٹ کی قائمہ کمیٹی کے اجلاس میں انکشاف کیا تھا کہ ہمارے فقیر سب سے زیادہ باہر جاتے ہیں۔
ان کا کہنا تھا کہ جتنے فقیر گرفتار ہوتے ہیں ان میں سے 90 فیصد پاکستانی ہوتے ہیں، عراقی اور سعودی سفیر ہمیں کہتے ہیں ان کی جیلیں بھر گئی ہے، اب یہ ہیومن ٹریفکنگ کا مسئلہ ہے۔
انہوں نے کہا کہ حرم کے اندر سے جتنے جیب کترے پکڑے جاتے ہیں ان میں زیادہ تر پاکستانی ہیں، یہ زیارت پر بھیک مانگنے جاتے ہیں، بھکاری زیادہ تر عمرہ ویزے پر جاتے ہیں۔
مزید خبریں :
اسلام آباد اور راولپنڈی میں آج پھر بارش اور ژالہ باری
11 گھنٹے پہلے
وزیراعظم شہباز شریف نے انسداد پولیو مہم کا افتتاح کردیا
11 گھنٹے پہلے
