مہنگائی کی وجہ سے بھیک بھی نہیں ملتی: بھکاری ووٹر کی دہائی
17 جولائی ، 2022
پنجاب اسمبلی کے 20 حلقوں میں ہونے والے ضمنی انتخابات کے لیے پولنگ کا عمل جاری ہے اور اس دوران جہاں بڑی عمر کے افراد اور نوبیاہتا جوڑے ووٹ ڈالنے پہنچے وہیں ایک معذور بھکاری بھی ووٹ کاسٹ کرنے پولنگ اسٹیشن پہنچا۔
جھنگ سے تعلق رکھنے والے 70 سالہ معذور بھکاری ووٹر نے پولنگ اسٹیشن نمبر 25 گورنمنٹ ہائی اسکول کوٹ سائی سنگھ میں اپنا ووٹ کاسٹ کیا۔
اس دوران میڈیا سے گفتگو کرتے ہوئے بھکاری کا کہنا تھا کہ اب تو جس سے بھیک مانگیں کہتا ہے کہ مہنگائی ہو گئی ہے۔
بھکاری نے یہ بھی کہا کہ نواز شریف جیتے گا تو زندگی گزارنا آسان ہو جائے گی۔
واضح رہے کہ پنجاب کے 20 حلقوں میں ضمنی انتخابات کے لیے آج پولنگ جاری ہے، صبح 8 بجے شروع ہونے والا پولنگ کا عمل بغیر کسی وقفے کے شام 5 بجے تک جاری رہے گا۔
