07 اکتوبر ، 2023 
حماس کے اسرائیل پر حملے، اسماعیل ہانیہ کے سجدہ شکر کی ویڈیو جاری
07 اکتوبر ، 2023
فلسطینی مزاحمتی تحریک حماس کے آپریشن الاقصیٰ فلڈ کے آغاز کے بعد حماس کے رہنما اسماعیل ہانیہ کے سجدہ شکر کی ویڈیو جاری کر دی گئی۔
عرب میڈیا رپورٹس کے مطابق فلسطینی مزاحمتی تحریک حماس کی جانب سے اسرائیل پر زمین، سمندر اور فضا سے حملے کیے گئے جس میں 22 اسرائیلی ہلاک اور سیکڑوں زخمی ہو گئے جبکہ حماس کا دعویٰ ہے کہ انہوں نے درجنوں اسرائیلیوں کو یرغمال بھی بنا لیا ہے۔
عرب میڈیا کے مطابق حماس کی القسام بریگیڈ نے پہلے ہزاروں راکٹ داغے اور پھر پیدل دستے سرحدی باڑھ توڑ کر اسرائیل میں داخل ہوئے، القسام بریگیڈ کے مزاحمت کار موٹرگلائیڈرز کے ذریعے فضا سے بھی اسرائیل میں داخل ہوئے جن کی ویڈیوز سوشل میڈیا پر زیر گردش ہیں۔
اسرائیلی اخبار "ہاریٹز" نے کہا ہے کہ حماس کے اچانک حملوں میں متعدد اسرائیلی ہلاک اور سیکڑوں زخمی ہوئے جبکہ لاتعداد اسرائیلیوں کو یرغمال بنا لیا گیا ہے۔
ادھر حماس کے اچانک حملے کے بعد اسرائیلی فوج کی جانب سے سرحدی بیس خالی کرا لیے گئے ہیں۔
حماس نے اسرائیل میں اپنی سہ طرفہ کارروائیوں کو" آپریشن الاقصیٰ فلڈ" کا نام دیا ہے جبکہ اسرائیلی فوج نے جوابی کارروائی کرتے ہوئے غزہ پر فضائی حملے شروع کر دیے جس میں اب تک کی اطلاعات کے مطابق 20 فلسطینی جاں بحق ہو چکے ہیں، اسرائیلی فوج کے حملوں سے غزہ میں فلسطینی وزارت داخلہ کی عمارت بھی تباہ ہو گئی ہے۔
ادھر حماس کی جانب سے جاری ویڈیو میں دیکھا جا سکتا ہے کہ غزہ پٹی کے سابق وزیراعظم اسماعیل ہانیہ دیگر رہنمائوں کے ساتھ ٹی وی اسکرین پر حماس کے تازہ حملوں کی خبر دیکھتے ہوئے بھی نظر آرہے ہیں اور سجدہ شکر بھی بجا لا رہے ہیں۔
مزید خبریں :
سعودی عرب نے کابل میں دوبارہ اپنے سفارتی مشن کا آغاز کردیا
23 دسمبر ، 2024
