گوگل کروم میں آخری 15 منٹ کی براؤزنگ ہسٹری کو ڈیلیٹ کرنا ممکن

13 اکتوبر ، 2023

کمپنی کی جانب سے اس کا اعلان کیا گیا / فائل فوٹو

گوگل کروم دنیا میں سب سے زیادہ استعمال کیا جانے والا ویب براؤزر ہے اور انٹرنیٹ استعمال کرنے والا لگ بھگ ہر فرد ہی روزانہ اس کو استعمال کرتا ہے۔

مگر کئی بار گوگل کروم کو استعمال کرنے کے بعد لوگوں کی خواہش ہوتی ہے کہ آخری چند منٹ کی ہسٹری کو ڈیلیٹ کردیا جائے۔

اس سے پہلے کروم کی پورے دن کی ہسٹری کو تو ڈیلیٹ کیا جا سکتا تھا مگر اب آخری 15 منٹ کی براؤزنگ ہسٹری کو صاف کرنا بھی ممکن ہو گیا ہے۔

کم از کم اینڈرائیڈ ڈیوائسز پر گوگل کروم میں آخری 15 منٹ کی براؤزنگ ہسٹری کو ڈیلیٹ کیا جا سکتا ہے۔

گوگل کی جانب سے اس نئے فیچر کا اعلان کیا گیا۔

کمپنی کی جانب سے بتایا گیا کہ یہ فیچر فی الحال صرف اینڈرائیڈ صارفین کے لیے ہے۔

آپ اب کروم پر آخری 15 منٹ کی ہسٹری ڈیلیٹ کر سکتے ہیں / اسکرین شاٹ

اس فیچر کو استعمال کرنے کے لیے گوگل کروم میں اوپر دائیں جانب تھری ڈاٹ مینیو پر کلک کرکے کلیئرنگ براؤزنگ ڈیٹا کے آپشن کا انتخاب کریں۔

کمپنی کی جانب سے اینڈرائیڈ ڈیوائسز میں گوگل کروم کے اس آپشن کے لیے بائی ڈیفالٹ آخری 15 منٹ کی ہسٹری کو ڈیلیٹ کرنے کا آپشن دیا جا رہا ہے، البتہ صارف زیادہ پرانی ہسٹری کو بھی صاف کر سکتا ہے۔

اس سے قبل براؤزنگ ہسٹری کو ڈیلیٹ کرنے کے لیے 5 آپشن موجود تھے، آخری گھنٹہ، آخری 24 گھنٹے، آخری ہفتہ، آخری مہینہ اور تمام براؤزنگ ہسٹری کو ڈیلیٹ کرنے کا آپشن تھا۔

مگر اب کوئیک ڈیلیٹ کا آپشن بھی اس میں شامل کیا جا رہا ہے جو ان صارفین کے لیے مددگار ثابت ہوگا جو کسی فون میں آخری چند منٹ کی ہسٹری تو ڈیلیٹ کرنا چاہتے ہیں مگر باقی ویب سرگرمیوں کو برقرار رکھنا چاہتے ہیں۔