15 اکتوبر ، 2023 
شاہین وسیم اکرم نہیں ہے اسے زیادہ نہیں چڑھانا چاہیے: روی شاستری
15 اکتوبر ، 2023
بھارت کے معروف کمنٹیٹر اور سابق ہیڈ کوچ روی شاستری نے پاکستانی فاسٹ بولر شاہین شاہ آفریدی کو خراب پرفارمنس پر آڑے ہاتھوں لیتے ہوئے کہا کہ وہ وسیم اکرم نہیں ہے انھیں زیادہ نہیں چڑھانا چاہیے۔
گزشتہ روز احمد آاباد میں آئی سی سی کرکٹ ورلڈ کپ کے سب سے بڑے ٹاکرے میں بھارت نے پاکستان کو یکطرفہ مقابلے کے بعد7 وکٹوں سے شکست دے دی تھی۔
بھارت کے خلاف جہاں پاکستان کی بیٹنگ لائن بری طرح ناکام رہی اور پوری پاکستانی ٹیم 42 اعشاریہ 5 اوور میں 191 رن پر ڈھیر ہوگئی تھی وہیں پاکستانی بولنگ بھی بہترین کارکردگی دکھانے میں ناکام رہی۔
پاکستان کی جانب سے شاہین آفریدی نے 2 اور حسن علی نے ایک وکٹ حاصل کی تھی۔
پاک بھارت میچ کے دوران روہت شرما کے 80 رنز ہو جانے کے بعد کمنٹری پینل میں موجود روی شاستری نے شاہین شاہ کی بولنگ کو تنقید کا نشانہ بنایا۔
روی شاستری کا کہنا تھا کہ شاہین ایک اچھا بولر ہے جو نئی گیند سے وکٹ حاصل کر سکتا ہے لیکن آپ کو یہ ماننا پڑے گا کہ اگر نسیم شاہ نہیں کھیل رہے اور پاکستان کی اسپن بولنگ کا معیار بھی کوئی خاص نہیں تو شاہین شاہ آفریدی کوئی وسیم اکرم نہیں ہے! اچھا بولر ہے لیکن انھیں اتنا بھی چڑھانے کی ضروت نہیں ہے۔
سابق بھارتی ہیڈ کوچ نے مزید کہا کہ ہمیں یہ ماننا ہوگا کہ وہ ایک عظیم کرکٹر نہیں ہے، اگر کوئی کرکٹر صرف اچھا ہے تو ہمیں اپنی تعریف صرف یہ کہنے تک محدود رکھنی چاہیے کہ وہ اچھا کرکٹر ہے۔
مزید خبریں :
اظہر علی کو پی سی بی میں اہم عہدہ مل گیا
22 نومبر ، 2024
