18 اکتوبر ، 2023 
غزہ میں جنگی اور عالمی انسانی قوانین کی خلاف ورزیوں کی اطلاعات ہیں: اقوام متحدہ
18 اکتوبر ، 2023
اقوام متحدہ کے دفتر برائے انسانی حقوق کا کہنا ہے کہ غزہ میں اسرائیل کی جانب سے روزانہ جنگی قوانین اور عالمی انسانی قوانین کی خلاف ورزیوں کی اطلاعات مل رہی ہیں۔
غزہ کی صورتحال پر اقوام متحدہ کے دفتر برائے انسانی حقوق کی ترجمان روینا شام دسانی کا کہنا تھا کہ گزشتہ دس روز میں غزہ کی پٹی سے 10 لاکھ سے زیادہ افراد بے گھر ہو چکے ہیں، غزہ پٹی کا بڑا حصہ ملبے کا ڈھیربن چکا ہے۔
انہوں نے کہا کہ غزہ میں اقوام متحدہ کے عملے کے 14 ارکان ہلاک ہوئے ہیں۔
ترجمان کا کہنا تھا کہ ملبے تلے کتنی لاشیں دبی ہیں ابھی یہ واضح نہیں ہے، آنے والے دنوں میں شہریوں کی اموات میں اضافے کا خدشہ ہے۔
انہوں نے مطالبہ کیا کہ اقوام متحدہ اسرائیلی فوج کو شہریوں، شہری تنصیبات کو نشانہ بنانے اور بلا امتیاز فضائی بمباری سے روکے۔
یاد رہے کہ اسرائیل کی جانب سے غزہ میں اسپتال پر ہونے والے تازہ حملے میں 800 سے زائد فلسطینی شہید ہوگئے، اسرائیلی طیاروں نے اسپتال کو نشانہ بنایا جس میں طبی عملہ، مریض اور پناہ لیے ہوئے عام شہری شہید ہوئے۔
فلسطینی وزارت صحت کے مطابق اسرائیلی طیاروں نے وسطی غزہ میں موجود اسپتال کو نشانہ بنایا جس میں 600 سے زائد افراد زخمی بھی ہوئے ہیں، متعدد افراد کی حالت تشویش ناک ہے اور اموات میں مزید اضافے کا خدشہ ہے۔
مزید خبریں :
غزہ پر اسرائیلی بمباری سے مزید 38 فلسطینی شہید
1 گھنٹے پہلے
مزید 2 ممالک آئندہ سال شینگن ممالک کا حصہ بننے کو تیار
22 نومبر ، 2024
حزب اللہ کے راکٹ حملے میں اسرائیلی شہری ہلاک
22 نومبر ، 2024
چچا کے تھپڑ مارنے پر 3 سالہ بھتیجی جان سے چلی گئی
22 نومبر ، 2024
