سائنس و ٹیکنالوجی

گوگل کروم میں 5 کارآمد فیچرز کا اضافہ

19 اکتوبر ، 2023

دنیا کے مقبول ترین ویب براؤزر کروم میں 5 نئے فیچرز کا اضافہ کر دیا گیا ہے۔

گوگل کروم کے یہ نئے فیچرز ایڈریس بار کے حوالے سے ہیں۔

کمپنی کے مطابق ان نئے فیچرز کا مقصد ایڈریس کا استعمال زیادہ بہتر بنانا ہے۔

پہلا فیچر آٹو کمپلیٹ فنکشن کو بہتر بنانے کے لیے ہے۔

پہلے کروم کی جانب سے یو آر ایل کو اس وقت آٹو کمپلیٹ کیا جاتا تھا جب آپ آغاز میں درست الفاظ ٹائپ کرتے تھے۔

مگر اب کروم کے ڈیسک ٹاپ ورژن میں کسی ویب سائٹ کے لیے استعمال کیے جانے والے کسی بھی لفظ سے آٹوکمپلیٹ کا عمل مکمل ہو جائے گا۔

جیسے اگر آپ نے کبھی فلائٹس کو سرچ کیا ہو تو محض fli لکھنے پر ہی کروم آٹو کمپلیٹ کی جانب سے گوگل فلائٹس کا یو آر ایل سجیسٹ کیا جائے گا۔

دوسرا فیچر مقبول ویب سائٹس کو سجیسٹ کرنے کے حوالے سے ہے، چاہے آپ نے اس سائٹ پر کبھی وزٹ نہ کیا ہو یا یو آر ایل میں حروف غلط ٹائپ کر رہے ہوں۔

تیسرا فیچر یو آر ایل ایڈریس میں ٹائپو خودکار طور پر درست کرنے کا ہے اور یہ فیچر 19 اکتوبر سے ہی تمام صارفین کو دستیاب ہوگا۔

چوتھے فیچر سے صارفین ایڈریس بار میں ہی بک مارکس فولڈر سرچ کر سکیں گے۔

اس کے لیے انہیں ایڈریس بار فولڈر کا نام درج کرنا ہوگا۔

جہاں تک آخری فیچر کی بات ہے تو گوگل کے مطابق اب ایڈریس بار کو پڑھنا زیادہ آسان ہوگا اور اس کے لیے ویژول لے آٹو کو بہتر کیا جا رہا ہے۔

مزید خبریں :