کھیل

جو بابر کو عظیم کھلاڑی کہتے ہیں انہوں نے عظیم کھلاڑی دیکھے ہی نہیں: حفیظ

29 اکتوبر ، 2023

بابر اعظم کی کپتانی میں پچھلے 3 سالوں کے دوران وہ میچیورٹی اور گروتھ نظر نہیں آئی جو آجانی چاہیے تھی : سابق کپتان کی رائے/فوٹوفائل

پاکستان کے سابق کپتان محمد حفیظ کا کہنا ہے کہ بابر اعظم اس وقت پاکستان کے تمام کھلاڑیوں کے مقابلےا چھے کھلاڑی ہیں لیکن ابھی ان کا شمار پاکستان کے عظیم کھلاڑیوں میں نہیں کیا جا سکتا۔

قومی چینل پر نشر پروگرام کے دوران بابر کی کپتانی پر بات کرتے ہوئے محمد حفیظ کا کہنا تھا کہ بابر اعظم کی کپتانی میں پچھلے 3 سالوں کے دوران وہ میچورٹی اور گروتھ نظر نہیں آئی جو آجانی چاہیے تھی، اب یہ فیصلہ بابر اور کرکٹ بورڈ کے آفیشلز نے کرنا ہے کیا بابر کی کپتانی کا پریشر دور کرکے ان کے ٹیلنٹ کو اجاگر کرنا ہے یا پھر بابر اسی پریشر کے اندر رہتے ہوئے اپنا ٹیلنٹ اجاگر کر سکتے ہیں۔

محمد حفیظ کا کہنا تھا کہ بطور کرکٹر بابر برے کھلاڑی نہیں ہیں لیکن بدقسمتی سے جو امیدیں بابر سے وابستہ کی جاتی ہیں یا پھر ان کا موازنہ جو دیگر کھلاڑیوں سے کیا جاتا ہے وہ درست نہیں ہے، بابر اس وقت کے تمام پاکستانی کھلاڑیوں میں سب سے اچھے کھلاڑی ہیں لیکن ان کا موازنہ جب عظیم کھلاڑیوں سے کیا جاتا ہے تو وہ بابر کے ٹیلنٹ کے ساتھ زیادتی ہو جاتی ہے، جو بابر کو پاکستان کے عظیم کھلاڑیوں سے ملاتے ہیں میں ان کے خلاف ہوں کیونکہ جو لوگ بابر کو عظیم کھلاڑیوں سے ملاتے ہیں شاید انھوں نے ابھی تک پاکستان کے یا دنیا کے عظیم کھلاڑی دیکھے ہی نہیں ہیں۔

سابق کپتان کا کہنا تھا کہ بابر بہت اچھے کھلاڑی ہیں لیکن وہ ابھی تک عظیم کھلاڑی نہیں ہوئے کیونکہ انھوں نے اپنے کیریئر میں ابھی بہت کچھ کرنا ہے لیکن ہم انھیں پہلے ہی عظیم کھلاڑی بنا دیں یہ بابر کے ٹیلنٹ کے ساتھ زیادتی ہوگی، اگر بابر کسی ٹورنامنٹ میں پرفارم نہ کرتے تو ان سے لگائی گئی امیدوں کا دباؤ اتنا زیادہ ہے کہ بری پرفارمنس پر لوگ بابر کو بہت برے طریقے سے ڈیل کرتے ہیں۔

انھوں نے مزید کہا میرا خیا ل ہے کہ اگر کپتانی کا دباؤ بابر کو ڈسٹرب کر رہا ہے اور وہ محسوس کرتے ہیں کہ اس سے ان کی گیم ڈسٹرب ہو رہی ہے تو اس کا فیصلہ ایمانداری سے انھوں نے خود کرنا ہے کہ وہ اس پریشر کے ساتھ ہی گیم اپنی جاری رکھنا چاہتے ہیں یا پھر پاکستان کیلئے اپنی پرفارمنس دے کر پاکستان کے عظیم کھلاڑیوں میں شامل ہونا چاہتے ہیں۔