غیر قانونی مقیم افراد اپنے ملک جائیں اور ویزا لے کر آسکتے ہیں: نگران وزیراعظم

لاہور: نگران وزیراعظم انوار الحق کاکڑ نے کہا ہےکہ رجسٹرڈ افغان مہاجرین کو واپس نہیں بھیج رہے تاہم غیر قانونی طور پر رہنے والے اپنے ملک جائیں ویزا لیں پھر پاکستان آسکتے ہیں۔

لاہور میں میڈیا سے گفتگو کرتے ہوئے نگران وزیراعظم نے کہا کہ ہم نے غیرقانونی طور پر مقیم لوگوں کو پہلے وقت دیا، ان کے کاروبار یا دیگر طریقوں سے ان کو پریشان نہیں کیا، ہم نے ان پر مکمل طور پر پابندی نہیں لگائی، یہ اپنے ملک جائیں ویزا لیں پھر آسکتے ہیں۔

انہوں نے کہا کہ رجسٹرڈ افغان مہاجرین کو واپس نہیں بھیج رہے، غیرقانونی مقیم افراد کو واپس جانے کے لیے وقت دیا ہے، دنیا کاکوئی ملک غیر قانونی افرادکو اپنے ملک میں رہنے کی اجازت نہیں دیتا، کسی بھی ملک کا شہری ویزا لےکر پاکستان آسکتا ہے۔

غیر قانونی مقیم افراد کے پاکستان چھوڑنے کا آج آخری دن، کل سے ملک گیر آپریشن ہوگا

وزارت داخلہ نے ملکی تاریخ میں پہلی بار فارن ایکٹ 1946 کے تحت تمام صوبوں کو غیر قانونی طور پر مقیم افراد کی بے دخلی کا حکم نامہ جاری کردیا

وزیراعظم کا کہنا تھا کہ حلقہ بندیوں کے لیے الیکشن کمیشن کا ایک طریقہ کار ہے، الیکشن کمیشن کو اختیارات پارلیمان نے دیے ہیں اور ہم الیکشن کمیشن کو کہہ رہے جو کام آپ نے کرنا ہے کریں جہاں ہماری معاونت درکار ہے کریں گے، جتنا آپ ووٹ کاسٹ کرنے کیلئے بے چین ہیں، اتنا میں بھی ہوں۔

انوار الحق کاکڑ نے مزید کہا کہ پیٹرول کی قیمت میں کمی اور اسمگلنگ پر جسے ہی ہاتھ ڈالا روپیہ مستحکم ہوا ہے، اشیائے خورونوش کی قیمتوں میں کمی آئی ہے، افغان ٹرانزٹ ٹریڈ میں اسمگل کے خلاف سختی کی ہے، اسمگلنگ پر سختی ہوئی ہے تو ملیں چلنا شروع ہوگئی ہیں۔

غزہ کی صورتحال پر نگران وزیراعظم کا کہنا تھا کہ غزہ کی صورتحال انتہائی خوفناک ہے، وہاں انسانیت کی تذلیل ہو رہی ہے، غزہ کی صورتحال انسانی المیہ کو جنم دے رہی ہے، چین کے حالیہ دورے میں عالمی رہنماؤں سے غزہ کی صورتحال پر گفتگو کی، ہم سمجھتے ہیں موجودہ کرائسس میں فوری جنگ بندی ہونی چاہیے۔

ایک سوال کے جواب میں انہوں نے کہا کہ وفاقی حکومت ملٹری کورٹ کے معاملے پر اپیل دائر کررہی ہے۔

نگران وزیراعظم کا کہنا تھا کہ آئی ایم ایف کا وفد 2 تاریخ کو آرہا ہے اور ہم نے اپنے ٹارگٹ سیٹ کیے ہیں۔