قواعد کی خلاف ورزی پر اب ائیر لائنز مسافروں کو بھاری جرمانے ادا کریں گی

سعودی ایوی ایشن گاکا نے فضائی مسافروں کے تحفظ کیلئے نئے سخت ترین قوانین بنا دیے ہیں جن کے تحت ائیر لائنز قواعد کی خلاف ورزی پر فضائی مسافروں کو بھاری جرمانہ ادا کریں گی۔ 

قوانین پر عملدرآمد سے متعلق نوٹیفکیشن جاری کردیا گیا ہے، فضائی مسافروں کے حقوق اور تحفظ کیلئے بنائے گئے قوانین 20 نومبر سے نافذ العمل کیے جارہے ہیں۔ 

قوانین کی خلاف ورزی کرنے پر ائیرلائن پر بھاری جرمانے ہوں گے اور مسافروں کو بھی ادائیگیاں کی جائیں گی، اس حوالے سے سعودی ایوی ایشن گاکا نے پی آئی اے سمیت تمام ائیر لائن کو احکامات جاری کر دیے ہیں۔

نئے قوانین کے مطابق پرواز کی روانگی میں تاخیر اور  منسوخی پر مسافروں کو  ائیر لائن معاوضہ ادا کرے گی، ائیر لائن پرواز کی روانگی میں 6 گھنٹے سے زائد تاخیر پر مسافروں کو ہوٹل سمیت تمام سفری سہولت مہیا کرے گی اور ائیر لائن مسافروں کو قیام طعام اور ٹرانسپورٹ فراہم کرنے کی پابند ہوگی۔

سعودی ایوی ایشن کے احکامات کے مطابق پرواز کی روانگی میں 3 گھنٹے سے زائد تاخیر پر مسافروں کو کھانا اور سہولت فراہم کرنا لازم قرار دیا ہے، ائیر لائن مسافروں کو پرواز کی 6 گھنٹے سے زائد تاخیر پر فی کس 750 ریال دینے کی پابند ہوگی، پرواز کی منسوخی کی صورت میں ائیر لائن مسافروں کو  150 فیصد ٹکٹ کی ادائیگی کرنا لازم قرار دی گئی ہے۔ 

سعودی ایوی ایشن کے قوائد کے مطابق امیگریشن ہونے کے بعد مسافر کو آف لوڈ کرنے پر ٹکٹ کی صورت میں 200 فیصد معاوضہ ادا کرنا ائیرلائن پر لازم قرار دے دیا گیا ہے، مسافر کو وہیل چیئر کی سہولت فراہم نہ کرنے پر ائیر لائن کو 500 سعودی ریال دینا لازم قرار دے دیا گیا ہے۔ 

گاکا قوانین کے مطابق ائیر لائن بغیر کسی وجہ منزل سے ہٹ کو کسی دوسرے شہر میں پرواز اتارنے پر بھی مسافروں کو معاوضہ ادا کرنے کی پابند ہوگی۔