اسرائیلی فوج کا لبنان میں صحافی کی گاڑی پر حملہ، 3 بھانجوں سمیت 4 افراد شہید

اسرائیلی فوج کی جانب سے لبنان کے جنوبی علاقے میں فضائی حملہ کیا گیا۔

اسرائیلی فورسز کی جانب سے صحافی کی گاڑی کو نشانہ بنایا گیا، حملے میں صحافی کی بہن کے 3 بچوں سمیت 4 افراد شہید ہو گئے۔

لبنانی وزیر خارجہ نے کہا کہ حملےکی معلومات اور تصاویر آج اقوام متحدہ میں جمع کرائیں گے۔

لبنانی تنظیم حزب اللہ نے جوابی کارروائی کرتے ہوئے اسرائیل کے علاقے کریات شمونہ پر میزائل حملے کیے جس میں ایک اسرائیلی فوج ہلاک ہو گیا۔

غزہ: اسرائیلی حملے میں ترک خبر ایجنسی کے فوٹوگرافر کے 4 بچے اور 4 بھائی اہلخانہ سمیت شہید

گزشتہ رات المغازی کیمپ پر اسرائیلی حملے میں 50 سے زائد فلسطینی شہید ہوئے ،7 اکتوبر سے اب تک شہید ہونے والے افراد کی تعداد 9770 ہوگئی ہے

گزشتہ روز اسرائیل نے غزہ میں المغازی کیمپ پر فضائی حملہ کیا جس میں ترک خبر ایجنسی کے فوٹو گرافر محمد علاؤل کے 4 بچے، 4 بھائی اور ان کے بچے شہید ہو گئے۔

خیال رہے کہ 7 اکتوبر سے غزہ میں جاری اسرائیلی بمباری میں اب تک 40 صحافیوں سمیت مختلف صحافتی اداروں سے تعلق رکھنے والے 60 کے قریب ملازمین شہید اور متعدد زخمی ہو چکے ہیں۔

اسرائیلی بمباری میں شہید ہونے والے افراد کی مجموعی تعداد 10 ہزار کے قریب پہنچ چکی ہے جبکہ 25 ہزار کے قریب افراد زخمی ہیں۔