عائزہ نے فلسطین کی صورتحال پر آواز کیوں نہیں اٹھائی؟ اداکارہ نے سوالوں پر خاموشی توڑ دی

پاکستان کی مقبول ترین اداکارہ عائزہ خان نے اب تک فلسطین کی صورتحال پر آواز نہ اٹھانے کی وجہ بتادی۔

7 اکتوبر سے اسرائیل کی جانب سے غزہ پر مسلسل حملے کیے جارہے ہیں، فلسطینی وزارت صحت کی جانب سے جاری بیان کے مطابق گزشتہ 24 گھنٹوں کے دوران اسرائیلی جارحیت سے مزید 306 فلسطینی شہید ہوئے جس کے بعد 7 اکتوبر سے اب تک شہید ہونے والے افراد کی تعداد 10 ہزار 328 ہوگئی ہے۔

دنیا بھر کی شوبز شخصیات سمیت معروف سلیبریٹیز غزہ کے حق میں آواز بلند کررہی ہیں جب کہ انسٹاگرام پر 13 ملین سے زائد فالوورز رکھنے والی پاکستان کی معروف اداکارہ عائزہ خان نے اب تک اسرائیل کی بمباری کے خلاف نہیں بولا تھا۔

اس حوالے سے مداح بھی خاصے ناراض دکھائی دیے اور اداکارہ کی سوشل میڈیا پوسٹس پر تبصرے کرکے انہیں یاد دلایا تاہم اب عائزہ نے تمام ناقدین کو ایک پوسٹ کے ذریعے جواب دیا ہے۔

عائزہ خان نے اپنی پوسٹ پر سوال 'آپ فلسطین کے حق میں سوشل میڈیا پر پوسٹ کیوں نہیں کررہیں؟' کے جواب میں کہا 'کیونکہ مجھے علم ہے کہ روزانہ فلسطینیوں کے لیے دعا کرنا پوسٹ کرنے سے زیادہ بہتر ہے'۔

عالمی مطالبات کے باوجود اسرائیلی حملے نہ رکے، وسطی غزہ اور الشاطئی کیمپ پر رات بھر بمباری

اسرائیلی فضائیہ کے لقدس اور کمال عدوان اسپتال کے نزدیک فضائی حملے جبکہ بچوں کے الرنتیسی اسپتال کو بھی خالی کرنے کی دھمکی دے دی۔

اداکارہ نے لکھا 'برائے مہربانی دعا کریں جتنا آپ کرسکتے ہیں اور اس پلیٹ فارم پر دوسروں پر انگلی اٹھانے اور تنقید کرنے سے گریز کریں، ہم سب کے بچے اور چاہنے والے ہیں اور ہم سب اس غم (فلسطینیوں پر ظلم) کو محسوس کرسکتے ہیں'۔

اپنی پوسٹ میں عائزہ نے مزید لکھا کہ ’ہم سوچ بھی نہیں سکتے کہ وہ سب کس تکلیف سے گزر رہے ہیں لیکن مجھے میرے رب پر یقین ہے اور مجھے امید ہے اللہ پاک بہت جلد انہیں انصاف دلائے گا، آمین'۔

ساتھ ہی عائزہ خان نے انسٹاگرام پر کچھ اسٹوریز بھی شیئر کیں۔

اُنہوں نے اپنی ایک اور انسٹاگرام اسٹوری میں غزہ کے بچوں کی تصویر شیئر کی اور لکھا کہ 'یااللہ رحم'۔

عائزہ خان نے اپنی انسٹاگرام اسٹوری میں جائے نماز کی تصویر شیئر کی اور کہا کہ 'اس تعلق کو کسی انٹرنیٹ کنکشن کی ضرورت نہیں ہے'۔

اداکارہ نے اپنی اسٹوری میں چند ہیش ٹیگز کا استعمال کیا جن میں لکھا تھا کہ 'انسانیت کے لیے، فلسطین کے لیے، دُنیا کے لیے اور امن کے لیے دُعا کررہی ہوں'۔