انگلینڈ کیخلاف میچ میں رن ریٹ کے پیچھے جائیں گے: بابراعظم

قومی ٹیم کے کپتان بابراعظم نے کہا ہےکہ  ہمارے ذہن میں نیٹ رن ریٹ کا پلان ہے، اس کے پیچھے جائیں گے اور  پوری پلاننگ ہے کہ 10 اوور کیسے کھیلنا ہے بعد میں کیا کھیلنا ہے جب کہ اگر فخر زمان 20 یا 30 اوور کھیل گیا تو ہم مطلوبہ رن ریٹ حاصل کرسکتے ہیں۔

انگلینڈ سے میچ سے قبل پریس کانفرنس میں بابر نے  اپنی کپتانی کے مستقبل کے سوال پر کہا کہ ابھی میرا فوکس اگلے میچ پر ہے، کپتانی کے مستقبل کا بعد میں دیکھیں گے۔

انہوں نے کہا کہ پچھلے3 سال سے میں ہی پرفارم کررہا تھا، کپتانی بھی کررہا تھا، مجھے نہیں لگتا کہ مجھ پر کوئی پریشر ہے، ٹیم کا فیصلہ کوچز اور کپتان کا ہوتا ہے  لیکن اگر کسی نے مشورہ دینا ہے تو نمبر سب کے پاس ہے،   ٹی وی پر بیٹھ کر بات کرنا آسان ہے۔ 

قومی ٹیم کے کپتان کا کہنا تھا کہ میری کارکردگی ایسی نہیں کہ لوگ کہیں کہ مجھ پر پریشر ہے، میرا ہدف تھا کہ بطور بیٹر اچھا فنش کروں، چاہتا تھا کہ ٹیم کو جتوانے کی کوشش کروں، صورتحال کے مطابق بیٹنگ کرتا ہوں،  اس کے حساب سے پلان کرتے ہیں، کبھی کبھار کنڈیشنز فیور نہیں کرتیں کہ کھل کر کھیلیں، یہاں ہر وینیو پر مختلف کنڈیشنز  ہیں،  ہم پہلی بار بھارت  آئے ہیں، ہمیں کنڈیشنز کا اندازہ نہیں تھا ، میں مانتا ہوں کہ توقعات کے مطابق پرفارم نہیں کر سکا۔

ورلڈکپ میں سیمی فائنل تک رسائی میں مشکل پر بات کرتے ہوئے بابراعظم نے کہا کہ افغانستان اور جنوبی افریقا والا میچ جیتنا چاہیے تھا،  امید تو ہر موقع پر مثبت رکھنی چاہیے ،کسی ایک شعبے کو نہیں، بطور ٹیم ہم اچھا نہیں کھیل پائے،کوشش کریں گے کہ غلطیوں سے سیکھیں، اس لیول پر غلطی کی گنجائش بہت کم ہوتی ہے۔

ورلڈکپ: سیمی فائنل میں پہنچنے کیلئے پاکستان کو انگلینڈ کو کتنے رنز سے ہرانا ہوگا؟

بھارت، جنوبی افریقا اور آسٹریلیا پہلے ہی ناک مرحلے کے لیے کوالیفائی کرچکے ہیں جبکہ نیوزی لینڈ نے بھی سیمی فائنل کی راہ ہموار کرلی ہے

انگلینڈ  کے خلاف میچ کی حکمت عملی پر بات کرتے ہوئے بابراعظم نے کہا کہ ہمارے ذہن میں نیٹ رن ریٹ کا پلان ہے، اس کے پیچھے جائیں گے، پوری پلاننگ ہے کہ 10 اوور کیسے کھیلنا ہے اور بعد میں کیا کھیلنا  ہے، اگر فخر زمان 20 یا 30 اوور کھیل گیا تو ہم مطلوبہ رن ریٹ حاصل کرسکتے ہیں جب کہ  رضوان اور افتخار کا بھی اہم کردار ہوگا۔

انہوں نے مزید کہا کہ کرکٹ میں کچھ بھی ہوسکتا ہے، ہم اچھے نوٹ پر کوشش کریں گے، ہم فنش اچھا نہیں کر پارہے ہیں، ہم ون ڈے میں نمبر ون بھی رہے ہیں۔