کھیل

' آپ دِلوں کے کپتان ہو'، قیادت چھوڑنے پر رضوان سمیت ساتھی کرکٹرز کا بابر کے نام پیغام

15 نومبر ، 2023

پاکستان کرکٹ ٹیم کی کپتانی سے دستبردار ہونے پر محمد رضوان سمیت ساتھی کرکٹرز نے بابر اعظم کے نام پیغام جاری کیے ہیں۔

بدھ کو پاکستان کرکٹ ٹیم کےکپتان بابر اعظم تینوں فارمیٹ کی کپتانی سے دستبردار ہوگئے جس کے بعد پی سی بی نے نئےکپتانوں کو مقرر کیا ہے۔

ذرائع کے مطابق پی سی بی کی جانب سے بابر کو صرف ٹیسٹ ٹیم کا کپتان برقرار رکھنےکی پیشکش کی گئی تھی تاہم بابر نے انکار کرتے ہوئے تینوں فارمیٹ کی کپتانی سے استعفیٰ دے دیا۔

پاکستان کرکٹ بورڈنے شان مسعود کو ٹیسٹ ٹیم کا کپتان اور شاہین آفریدی کو ٹی ٹوئنٹی ٹیم کا کپتان مقرر کردیا۔

یہ بھی پڑھیں

کپتانی سے دستبردار ہونے پر پاکستان کرکٹ ٹیم کے کھلاڑیوں نے بابر اعظم کے لیے نیک تمناؤں کا اظہار کیا ہے۔

پاکستان کرکٹ ٹیم کے وکٹ کیپر بیٹر محمد رضوان نے سوشل میڈیا پر بیان جاری کرتے ہوئے لکھا کہ'بابر آپ دِلوں کے کپتان ہو، آپ یقینی طور پر پاکستان کے عظیم ترین بیٹرز میں سے ایک ہیں'۔

رضوان نے بابر کیلئے کہا کہ آپ کی ایمانداری، محبت، دیانت داری، خیالات، اور بطور کپتان پاکستان کے لیے کوششیں قابل توجہ ہیں'۔

پاکستان ٹی ٹوئنٹی کے نئے کپتان شاہین آفریدی نے لکھا کہ' بابر آپ کی مثالی قیادت میں بہترین ٹیم ورک او ر دوستی دیکھی، ٹیم کو متحد کرنے اور اجتماعی کامیابی کے لیے آپ کی صف اول کی قیادت اور عزم قابل تعریف ہے، مجھے انتظار ہے کہ آپ بیٹنگ میں مزید ریکارڈ توڑیں گے انشاءاللہ'۔

اس کے علاوہ لیگ اسپنر شاداب خان نے بابر کیلئے نیک خواہشات کا اظہار کیا جبکہ نئے مقرر ہونے والے کپتان شان مسعود اور شاہین آفریدی کو مبارک باد بھی دی۔