18 نومبر ، 2023 
ورلڈکپ: روہت کے ٹاس کے طریقے نے کیوی کھلاڑیوں کے ذہنوں میں سوالات اٹھادیے
18 نومبر ، 2023
آئی سی سی ون ڈے ورلڈکپ کے پہلے سیمی فائنل میں بھارت نے کیویز کو شکست دے کر فائنل کے لیے کوالیفائی کیا لیکن نیوزی لینڈ کے کیمپ میں بھارتی کپتان روہت شرما کے ٹاس کے طریقے پر کئی سوالات اٹھائے گئے ہیں۔
سابق پاکستانی کرکٹر سکندر بخت نے جیو نیوز کے پروگرام میں یہ سوال اٹھایا تھا کہ بھارت اور نیوزی لینڈ کے درمیان پہلے سیمی فائنل میں ٹاس کے وقت روہت شرما نے سکہ دور کیوں پھینکا؟ انہیں اوپر کی جانب اچھالنا چاہیے تھا لیکن انہوں نے کیوی کپتان کین ولیمسن سے کافی دور پھینکا۔
سکندر بخت نے کہا جب بھی روہت شرما کو ٹاس کے لیے سکہ تھمایا جاتا ہے وہ اسی طرح سے سکے کو دور پھینکتے ہیں تاکہ صرف میچ ریفری نتیجہ دیکھ سکے۔
امریکی نیوز چینل فاکس نیوز نے اپنی ایک رپورٹ میں انکشاف کیا ہے کہ اس حوالے سے کیوی کیمپ میں بھی تشویش کی لہر دوڑ گئی ہے۔
رپورٹ کے مطابق فاکس کرکٹ سے بات کرتے ہوئے نیوزی لینڈ کیمپ کے ذرائع نے کہا کہ ٹورنامنٹ کے دوران روہت شرما کے ٹاس کے طریقے پر سب سوالات اٹھا رہے ہیں۔
دوسری جانب پاکستان کے سابق کرکٹر وسیم اکرم اور معین خان نے اس قسم کے خیالات کو رد کردیا۔
وسیم اکرم نے نجی ٹی وی کے ایک کرکٹ شو میں اس حوالے سے کہا کہ 'یہ فیصلہ کون کرتا ہے کہ سکا ہوا میں اچھالنے کے بعد کہاں گرنا چاہیے؟ یہ صرف اسپانسرشپ کے لیے ہے، سکہ کہیں بھی گر سکتا ہے، مجھے شرمندگی ہورہی ہے'۔
اس کے علاوہ شو میں موجود معین خان نے کہا 'یہ سچ نہیں ہے، میرے خیال میں انہیں (سکندر بخت) غلط فہمی ہوئی ہے، ہر کپتان کا سکہ اچھالنے کا طریقہ الگ ہوتا ہے'۔
