’مسئلہ فلسطین حل کیے بغیر امن قائم نہیں ہو سکتا، دنیا پر تیسری عالمی جنگ کے خطرات منڈلا رہے ہیں‘
19 نومبر ، 2023
لاہور: جماعت اسلامی کے مرکزی رہنما لیاقت بلوچ نے خبردار کیا ہے کہ فلسطینیوں کی نسل کشی کی جا رہی ہے اور موجودہ صورت حال دنیا کو ایک ایٹمی جنگ کی طرف لے جا سکتی ہے۔
لاہور میں آج جماعت اسلامی کی جانب سے غزہ مارچ کا انعقاد کیا جا رہا ہے جس سے فلسطینی مزاحمتی تنظیم حماس کے سیاسی ونگ کے سربراہ اسماعیل ہنیہ بھی ویڈیو لنک کے ذریعے خطاب کریں گے۔
ترجمان جماعت اسلامی کا اس حوالے سے کہنا ہے کہ اسرائیل امریکا کی پشت پناہی سے غزہ کے مسلمانوں پر مسلسل بمباری کر رہا ہے، غزہ مارچ کا پیغام ہے کہ ہم فلسطینیوں کو تنہا نہیں چھوڑیں گے۔
اس حوالے سے لاہور میں میڈیا سے گفتگو کرتے ہوئے جماعت اسلامی کے مرکزی رہنما لیاقت بلوچ نے کہا کہ غزہ کی سرزمین پر 6 ہزار بچے شہید ہو گئے، فلسطینیوں کی نسل کشی کی جا رہی ہے، انسانیت سے ہمدردی رکھنے والے آج سراپا احتجاج ہیں، دنیا بھر میں مسلمانوں اور غیر مسلموں نے فلسطینیوں سے بے مثال محبت کا اظہار کیا۔
لیاقت بلوچ کا کہنا تھا فلسطین کا مسئلہ حل کیے بغیر امن قائم نہیں ہو سکتا، پوری دنیا بدامنی سے دو چار ہو رہی ہے، دنیا پر تیسری عالمی جنگ کے خطرات منڈلا رہے ہیں، یہ صورتحال ایک ایٹمی جنگ کی طرف جا سکتی ہے۔
انہوں نے کہا کہ او آئی سی کے سربراہوں نے مایوس کیا ہے، غزہ میں خوراک، پانی اور ادویات کی قلت ہے، امریکا، برطانیہ اور یورپی ممالک اپنے خلاف نفرت بڑھا رہے ہیں، مستحکم اسلامی پاکستان عالم اسلام میں اپنی عزت کا مقام بنا سکتا ہے۔
رہنما جماعت اسلامی کا کہنا تھا حماس اور فلسطینیوں کو یقین دلاتے ہیں کہ 25 کروڑ پاکستانی آپ کے ساتھ ہیں، آج کا غزہ مارچ عظیم الشان ہو گا۔
