30 نومبر ، 2023 
وفاقی کابینہ نے سائفر کیس کا ٹرائل اڈیالہ جیل میں کرنے کی منظوری دیدی
30 نومبر ، 2023
نگران وفاقی کابینہ نے سائفر کیس کا ٹرائل اڈیالہ جیل میں کرنے کی منظوری دے دی۔
ذرائع کے مطابق وزارت قانون و انصاف کی سمری پر کابینہ اراکین سے سرکولیشن کے ذریعے منظوری لی گئی۔
ذرائع کا بتانا ہے کہ سابق وزیراعظم عمران خان اور سابق وزیر خارجہ شاہ محمود سمیت دیگر افراد کے خلاف آفیشل سیکریٹ ایکٹ کے تحت اڈیالہ جیل میں ہی ٹرائل ہو گا۔
ذرائع کا کہنا ہے کہ خصوصی عدالت کے جج ابو الحسنات ذو القرنین کے فیصلے کی روشنی میں وفاقی کابینہ سے سائفر کیس کا ٹرائل اڈیالہ جیل میں کرنے کی منظوری لی گئی۔
ذرائع کے مطابق وفاقی کابینہ کو اسلام آباد ہائیکورٹ کے جیل ٹرائل کالعدم قرار دینےکے فیصلے سے بھی آگاہ کیا گیا، وفاقی حکومت نے سائفر اور 190 ملین پاونڈ کیس کیلئےعدالتوں کےقیام کےقانونی تقاضے پورے کر لیے۔
یاد رہے کہ گزشتہ روز وفاقی کابینہ نے عمران خان اور بشریٰ بی بی کے خلاف 190 ملین پاؤنڈ القادر ٹرسٹ کیس کا ٹرائل بھی جیل میں کرنے کی منظوری دی تھی۔
