بھٹو کیس کی طرح کیا ہم نواز شریف کو انصاف کیلئے 45 سال انتظار کریں؟ جاوید لطیف

لاہور: مسلم لیگ (ن) کے رہنما جاوید لطیف نے کہا ہےکہ آج خوشی ہے کہ 45 سال بعد ذوالفقاربھٹو کے عدالتی قتل کا کیس سنا جارہا ہے لیکن کیا اس وقت جو ناانصافی ہوئی اس کی تلافی ہوسکتی ہے؟ کیا ہم نواز شریف کو انصاف کی فراہمی کیلئے 45 سال انتظار کریں؟

لاہور میں میڈیا سے گفتگو کرتے ہوئے جاوید لطیف نے کہا کہ ہم انسداد دہشتگردی عدالت میں 5 منٹ لیٹ ہو جاتے تو ضمانت خارج ہوجاتی، لاڈلے کے لیے صبح 8 بجے عدالت لگتی تھی اور رات 8 بجے وہ کہتا تھا ابھی حاضری کا موڈ نہیں مگر جو آئین اور قانون کی بات کرتے تھے ان پر غداری کے مقدمات تھے۔

انہوں نے کہا کہ  آج خوشی ہے کہ 45سال بعد ذوالفقاربھٹو کے عدالتی قتل کا کیس سنا جارہا ہے، کیا اس وقت جو ناانصافی ہوئی اس کی تلافی ہوسکتی ہے، نواز شریف کو بار بار سزا دی جاتی رہی اور 2017 میں انصاف کا قتل ہوا، کیا ہم نواز شریف کو انصاف کی فراہمی کیلئے 45سال انتظار کریں؟ 

صرف حکومت نہیں لیں گے، 2017 کے جعلی مقدموں کا احتساب بھی چاہتے ہیں: نواز شریف

ہمیں جیلوں میں ڈالا گیا، سزائیں دی گئیں، جنہوں نے بوگس مقدمے بنائے کوئی ان سے پوچھے گا؟ قائد مسلم لیگ ن

لیگی رہنما کا کہنا تھا کہ جو 190ملین پاؤنڈ کھا جائے وہ صادق اور امین ہو گا ؟ جو بگاڑپیدا کرے اسے جیل میں بھی 10کمروں پر مشتمل سب کچھ فراہم کیا جاتا ہے، جس نے پاکستان کو چولیں ہلادیں اس کو آج بھی جیل پکی دیسی مرغی چاہیے۔

مریم اورنگزیب کی گفتگو

اس موقع پر لیگی ترجمان مریم اورنگزیب نے کہا کہ مجھ پر بانی پی ٹی آئی نے دہشتگردی کا مقدمہ بنایا، ہم پر یہ دہشتگردی کے مقدمے بناتے رہے اور خود 9 مئی کو ریاست پر حملہ کیا، دوسروں پر دہشتگردی کے مقدمے بنانے والا خود 9 مئی کا مجرم ہے،  بانی پی ٹی آئی ہی 9 مئی کا ماسٹر مائنڈ ہے۔

سابق وزیر کا کہنا تھاکہ 190ملین پاؤنڈ قومی خزانے میں آنے تھے عدالت کے اکاؤنٹ میں نہیں، ان کی اہلیہ ہیرے جواہرات بٹورتی رہیں، اب یہ کہتے ہیں کہ نواز شریف نے 9 مئی کا واقعہ کروایا ، کیا نواز شریف پی ٹی آئی کے قائدین اور کارکنوں کو ہدایات دیتے تھے؟ 

مریم اورنگزیب نے دعویٰ کیا کہ پی ٹی آئی کو آج بھی فارن فنڈنگ آرہی ہے اور عوام کو بیروزگاری کا سامنا ہے لیکن عوام پریشان نہ ہوں ملک ایک بار پھر ترقی کی منازل طے کرے گا، عوام 8 فروری کو نواز شریف کو پھر وزیراعظم بنائیں گے۔