کاروبار

ایف بی آر ری اسٹرکچرنگ: ملک مالیاتی بحران کا شکار ہوسکتا ہے

16 جنوری ، 2024

ایس آئی ایف سی کی قیادت نے بھرپور خلوص کے ساتھ آمدن اکٹھاکرنے کے میکنزم کو بہتر بنانا چاہا تھا لیکن چند ناکام حلقوں نے اس خواہش کو اپنے لیے ایک موقع کے طور پردیکھا: ذرائع/ فائل فوٹو

اسلام آباد: وفاقی حکومت ایف بی آر کی ری اسٹرکچرنگ کی منظوری کےلیے مکمل طور پر تیار ہے حالانکہ ادارے کے افسران کا خیال ہے کہ اس فیصلے سے ملک مالیاتی بحران کا شکار ہوسکتا ہے۔

اس حوالے سے متعلقہ افسران نے دی نیوز سے نام نہ ظاہر کرنے کی شرط پر کہا کہ ایس آئی ایف سی کی اعلیٰ قیادت، جس نے ایف بی آر کی ری اسٹرکچرنگ کی منظوری دی ہے اسے بھی ان اصلاحات کے حامی ذاتی مفاد رکھنے والے حلقوں نے گمراہ کیا ہے۔

ان ذرائع نے مزیدانکشاف کیا کہ ایس آئی ایف سی کی قیادت نے بھرپور خلوص کے ساتھ آمدن اکٹھاکرنے کے میکنزم کو بہتر بنانا چاہا تھا لیکن چند ناکام حلقوں نے اس خواہش کو اپنے لیے ایک موقع کے طور پردیکھا جس سے ان کی اہمیت بڑھ سکتی تھی اور وہ اسے اپنی چھوٹے ذاتی مفاد کے لیے استعمال کرسکیں۔

نگران وزیرخزانہ ڈاکٹر شمشاد اختراپنی تعیناتی کے بعد سے ایف بی آر کی ری اسٹرکچرنگ کے لیے پرعزم کوششیں کر رہی ہیں تاہم اس حوالے سے آنے والی تجاویز میں ثابت قدمی نہیں ہے اور تبدیلیوں کا پنڈولم کبھی ایک انتہا کو چھوتا ہے تو کبھی دوسری انتہا کو چھوتا ہے۔

بات شروع یہاں سےہوئی تھی کہ ٹیکس کی ایک متحدہ ایجنسی ہونی چاہیے جو تمام وفاقی اور صوبائی ٹیکسز جمع کرے لیکن اب کوشش یہ ہو کہ موجودہ ایف بی آر کو متعدد بورڈز اوراداروں میں تقسیم کر دیا جائے جن میں پرائیویٹ افراد کی مؤثر موجودگی ہو تاکہ ان بورڈز کے کام کی نگرانی بھی ہوسکے۔