20 جنوری ، 2024 
ملک بھر میں شدید دھند، سال کے پہلے 20 دن میں 535 پروازیں منسوخ
20 جنوری ، 2024
شدید دھند کی وجہ سے آج وفاقی دارالحکومت اسلام آباد کا فلائٹ شیڈول زیادہ متاثر ہوا ہے اور مختلف ائیرپورٹس کی 19 پروازیں منسوخ کردی گئیں جب کہ 6 پروازیں متبادل ائیرپورٹس پر منتقل کی گئیں۔
موسمی خرابی کی وجہ سے جمعہ کو 45 پروازیں منسوخ اور 15 متبادل ائیرپورٹس پر اتاری گئیں۔
سال کے پہلے 20 دن میں موسمی خرابی کی وجہ سے 535 پروازیں منسوخ اور 125 سے زائد متبادل ائیر پورٹ پر لینڈ کرائی جاچکی ہیں۔
آج اسلام آباد کی 4 غیر ملکی پروازیں کراچی اور لاہور اتار لی گئیں۔
ایوی ایشن ذرائع کے مطابق دبئی سے پی کے 134 اور دمام اسلام آباد کی پرواز پی ایف 747 کو ری روٹ کرکے کراچی اتارا گیا۔
پی آئی اے کی شارجہ اسلام آباد کی پرواز پی کے 182 ابوظبی اسلام آباد کی پرواز پی کے 162، جدہ ملتان پی کے 840 کو لاہور لینڈ کرایا گیا جب کہ دبئی لاہور کی پرواز پی کے 204 کو اسلام آباد میں اتارا گیا۔
فلائٹ شیڈول کے مطابق اسلام آباد گلگت، اسکردو کی 4 پروازیں منسوخ کی گئیں۔
سیالکوٹ بحرین، دبئی کی 4 غیرملکی پروازیں اور لاہور جدہ سعودی ائیر لائن کی پروازیں بھی منسوخ کردی گئیں۔
لاہور سے جدہ، دبئی، نجف، کراچی اورریاض کی پروازوں کی روانگی میں بھی تاخیر ہوئی۔
اس کے علاوہ دوحہ، دبئی، جدہ بحرین ارومکی کی پروازیں اسلام آباد سے وقت پر اڑان نہ بھرسکیں۔
