24 جنوری ، 2024 
کراچی: سرکاری اسپتالوں کا پورا عملہ سینئر ڈاکٹروں سمیت الیکشن ڈیوٹی کیلئے طلب
24 جنوری ، 2024
کراچی: 8 فروری کو ہونے والے عام انتخابات کیلئے سینئر ڈاکٹروں سمیت سرکاری اسپتال کا پورا عملہ طلب کرلیا گیا۔
جیونیوز کے مطابق کراچی کے عباسی شہید اسپتال سمیت کے ایم سی کے دیگر اسپتالوں کا پورا عملہ الیکشن ڈیوٹی پر طلب کیا گیا ہے۔
سینئر ڈاکٹرز، آر ایم اوز اور دیگر عملے کو الیکشن تربیت کیلئے آنے کی ہدایت کی گئی ہے جب کہ اسپتال کےآئی سی یو سمیت تمام شعبوں کے ڈاکٹرز اور عملے کو بھی بلا لیا گیا ہے۔
عباسی شہید اسپتال کے ڈاکٹرز اور عملہ ضلع کیماڑی اور غربی میں الیکشن ڈیوٹی پر تعینات ہوگا، عباسی شہید اسپتال انتظامیہ نے الیکشن ڈیوٹی سے متعلق میئر کراچی کو بذریعہ خط آگاہ کردیا ہے۔
انتظامیہ کا مؤقف ہے کہ قانون کے مطابق ایمرجنسی اسٹاف کو الیکشن ڈیوٹی پر تعینات نہیں کیا جاتا، محکمہ صحت نے بھی انتخابات کے دوران اسپتالوں کو ہائی الرٹ کیا ہے، محکمہ صحت کی حساس علاقوں میں انتخابات میں میڈیکل کیمپ لگانےکی ہدایت کی گئی ہے۔
