24 جنوری ، 2024 
توشہ خانہ اور 190ملین پاؤنڈ ریفرنسز میں جیل ٹرائل کیخلاف درخواستوں پر فیصلہ محفوظ
24 جنوری ، 2024
اسلام آباد ہائی کورٹ نے بانی پی ٹی آئی عمران خان کے خلاف 190 ملین پاؤنڈ اور توشہ خانہ نیب ریفرنسز میں جیل ٹرائل کے خلاف درخواستوں پر فیصلہ محفوظ کرلیا۔
اسلام آباد ہائی کورٹ کے چیف جسٹس عامر فاروق اور جسٹس طارق محمود جہانگیری پر مشتمل بینچ نے بانی پی ٹی آئی کی 190 ملین پاؤنڈ اور توشہ خانہ نیب ریفرنسز میں جیل ٹرائل کے خلاف درخواستوں پر سماعت کی۔
بانی تحریک انصاف کے وکیل شعیب شاہین نے دلائل میں کہا کہ ریفرنس دائر نہیں ہوا اور ٹرائل کا نوٹیفکیشن جاری ہوگیا، اس عمل میں غیر ضروری جلد بازی واضح ہے۔
اٹارنی جنرل نےکہا کہ اڈیالہ جیل میں نیب مقدمات کا ٹرائل اوپن کورٹ میں ہو رہا ہے۔
شعیب شاہین ایڈووکیٹ نےکہا کہ احتساب عدالت کے جج تمام کیسز چھوڑ کر دوکیسز کے لیے روزانہ اڈیالہ جیل چلے جاتے ہیں۔
اسپیشل پراسیکیوٹر نیب امجد پرویز نےکہا کہ بانی پی ٹی آئی سابق وزیر اعظم ہیں اور سکیورٹی ایشوز کی وجہ سے جیل سماعت کا نوٹیفکیشن جاری ہوا۔
شعیب شاہین نےکہا کہ نیب کے پاس وفاقی حکومت کو جیل ٹرائل کے لیے لکھنےکا کوئی اختیار نہیں تھا۔
چیف جسٹس نےکہا کہ اس میں کوئی شک نہیں کہ جیل ٹرائل غیرمعمولی حالات میں ہوتا ہے۔
عدالت نے دلائل سننےکے بعد فیصلہ محفوظ کرلیا۔
