04 فروری ، 2024 
الیکشن کمیشن نے نگران حکومت کو پی آئی اے کی نجکاری سے روک دیا
04 فروری ، 2024
الیکشن کمیشن آف پاکستان نے نگران حکومت کو فیڈرل بورڈ آف ریونیو (ایف بی آر) میں اصلاحات کرنے اور پاکستان انٹرنیشنل ائیر لائنز (پی آئی اے) کی نجکاری سے روک دیا۔
سیکرٹری الیکشن کمیشن نے نگران وزیراعظم کے سیکرٹری اور سیکرٹری کابینہ ڈویژن کو خطوط لکھ دیے۔
نگران وزیراعظم کے سیکرٹری کے نام خط میں سیکرٹری الیکشن کمیشن ڈاکٹر آصف حسین نے لکھا کہ نگران حکومت ایف بی آر میں اصلاحات نہ کرے، یہ کام انتخابات کے بعد بننے والی منتخب حکومت کے لیے چھوڑ دیا جائے۔
خط میں کہا گیا ہے کہ ایف بی آر کی اصلاحات ایک اہم پالیسی فیصلہ ہے جو منتخب حکومت کا اختیار ہے۔
سیکرٹری کابینہ ڈویژن کامران علی افضل کو خط میں سیکرٹری الیکشن کمیشن نے لکھاکہ پی آئی اے کی نجکاری کے معاملات کی تمام دستاویزات جائزے کے لیے الیکشن کمیشن کو فراہم کی جائیں۔
خط کے متن کے مطابق الیکشن کمیشن کی جانب سے اس معاملے پر کسی بھی فیصلے سے پہلے نگران حکومت پی آئی اے نجکاری کے کسی معاہدے پر دستخط کرنے سے اجتناب کرے۔
خیال رہے کہ ملک میں عام انتخابات کیلئے 8 فروری کو پولنگ ہوگی جس میں 3 دن رہ گئے ہیں۔
