دو گھنٹوں کے وقفے کے بعد گوادر میں دوبارہ بارش شروع ہوگئی

گوادر میں 16 گھنٹوں سے زائد تک مسلسل بارش میں دو گھنٹوں کے وقفے کے بعد دوبارہ بارش شروع ہوگئی، شہری اپنی مدد آپ کے تحت نقل مکانی پر مجبور ہوگئے ہیں جبکہ نظام زندگی مکمل طور پر مفلوج ہوکر رہ گیا ہے۔

شدید بارش کے باعث شہر بھر کو بجلی کی فراہمی معطل ہوگئی جبکہ کئی علاقوں موبائل نیٹ ورک بھی بند ہو گیا ہے، متعلقہ محکموں کے موقع سے غائب ہونے کے باعث شہری بے سروسامانی کی حالت میں رات گزارنے پر مجبور ہیں۔

16گھنٹے سے زائد مسلسل بارش سےگوادر ڈوب گیا، شہری نقل مکانی پر مجبور

پانی گھروں اور دکانوں میں داخل ہوگیا ہے، بجلی کا نظام بھی متاثر ہوا ہے، شہریوں کو شدید مشکلات کا سامنا ہے

محکمہ موسمیات کے مطابق کل صبح 4 سے رات 8 بجے تک گوادر میں 168.8 ملی میٹر بارش ریکارڈ کی گئی ہے۔

واضح رہے کہ گوادر میں 16 گھنٹے سے زائد مسلسل بارش کے باعث معمولات زندگی شدید متاثر ہوگئے ہیں، نشیبی علاقے زیر آب آگئے ہیں اور بجلی کا نظام بھی متاثر ہوا ہے۔

گوادر میں بارش وقفے وقفے سے جاری ہے، سڑکیں زیر آب آگئیں اور پانی گھروں اور دکانوں میں داخل ہوگیا ہے، جس کے باعث شہریوں کو مشکلات کا سامنا ہے۔ کئی مکانات گر گئے ہیں جس کے باعث شہری نقل مکانی پر مجبور ہیں۔

نکاسی کا مؤثر نظام نہ ہونے سے پانی سڑکوں پر جمع ہوگیا ہے، گوادر کے علاقوں ٹو باغ، شیخ عمر، سہرابی وارڈ، ملابند تھانہ وارڈ اور شمبے سمائیل میں بارش کا پانی گھروں میں داخل ہوگیا ہے۔

جنت بازار اور بلال مسجد ائیرپورٹ روڈ پر بارش کا پانی دکانوں میں داخل ہوگیا ہے۔ چیئرمین یوسی سربندن کے مطابق تیز ہواؤں کے باعث کئی کشتیاں آپس میں ٹکرا کر ٹوٹ گئی ہیں۔