05 مارچ ، 2024 
شادی کی سالگرہ پر تحفہ نہ لانے پر بیوی نے شوہر کو چاقو سے وار کرکے زخمی کردیا
05 مارچ ، 2024
شادی کی سالگرہ پر شوہر کی جانب سے دیا جانے والا تحفہ بیوی کے لیے خاص ہوتا ہے لیکن بھارت میں تحفہ نہ ملنے پر ایک خاتون نے شوہر پر حملہ کردیا۔
بھارتی میڈیا کے مطابق بنگلورو میں شادی کی سالگرہ کا تحفہ نہ ملنے پر ناراض بیوی نے سوتے شوہر پر چاقو سے وار کیا جس کے بعد شوہر نے بیوی کے خلاف اقدام قتل کا مقدمہ درج کرادیا۔
بھارتی میڈیا پر جوڑے کا اصل نام خفیہ رکھتے ہوئے بتایا گیا ہے کہ 37سالہ شہری ایک پرائیویٹ فرم میں ملازم ہے اس کی 35 سالہ بیوی نے اس پر چاقو سے حملہ کردیا۔
شوہر کے مطابق گزشتہ ہفتے اس کی اہلیہ نے کچن سے چاقو اٹھاکراس وقت حملہ کیا جب وہ سورہا تھا لیکن غنودگی کے باوجود وہ بیوی کو دور دھکیلنے میں کامیاب ہوگیا جب کہ پڑوسیوں کی مدد سے وہ طبی امداد کے لیے اسپتال پہنچا۔
پولیس کے مطابق دوران تحقیقات یہ بات سامنے آئی شوہر اپنے دادا کی موت کی وجہ سے شادی کی سالگرہ پر بیوی کیلئے تحفہ نہیں خرید سکا تھا جس پر بیوی نے طیش میں آکر اس پر حملہ کیا۔
