13 مارچ ، 2024 
آئی ایم ایف سے آخری قسط کیلئے تمام اہداف پورے کرلیے: وزارت خزانہ
13 مارچ ، 2024
اسلام آباد: پاکستان نے آئی ایم ایف سے آخری قسط کے لیے تمام اہداف پورے کرلیے۔
وزارت خزانہ کی جانب سے جاری اعلامیے میں کہا گیا ہےکہ آئی ایم ایف کے جائزہ مشن کے ساتھ مذاکرات 14 سے 18 مارچ تک شیڈول ہیں اور پاکستان نے اسٹینڈ بائی معاہدے کے تحت آخری قسط ملنے کے تمام اہداف پورے کرلیے ہیں۔
وزارت خزانہ کا کہنا ہےکہ اگر آئی ایم ایف کے ساتھ اسٹاف لیول معاہدہ ہوگیا تو جائزہ مشن 1.1 ارب ڈالر کی قسط جاری کرنے کی سفارش کرے گا اور جائزہ مشن کی سفارشات کی آئی ایم ایف ایگزیکٹو بورڈ سے منظوری کے بعد قسط جاری ہوگی۔
پاکستان آئی ایم ایف سے بڑا اور طویل پروگرام لینے کا خواہشمند
دوسری جانب وفاقی وزیر خزانہ محمد اورنگزیب نے کہا ہے کہ پاکستان عالمی مالیاتی فنڈ (آئی ایم ایف) سے بڑا اور طویل پروگرام لینے کا خواہشمند ہے۔
اسلام آباد میں میڈیا سے بات چیت کرتے ہوئے وزیر خزانہ کا کہنا تھا آئی ایم ایف سے بڑا اور طویل مدت کا پروگرام لینا چاہتے ہیں، پاکستان اپنے کوٹے کے حساب سے بڑا پروگرام لینے کی کوشش کرے گا، آئی ایم ایف سے پاکستان کی تاریخ کا سب سے طویل مدت کا پروگرام لینا چاہتے ہیں، آئی ایم ایف پروگرام میں تسلسل رہیں گے تو معاشی نظم و ضبط رہے گا۔
