پی ٹی آئی کا پشاور ہائیکورٹ کا مخصوص نشستوں سے متعلق فیصلہ سپریم کورٹ میں چیلنج کرنے کا اعلان

پاکستان تحریک انصاف نے پشاور ہائیکورٹ کے مخصوص نشستوں سے متعلق سنی اتحاد کونسل کی درخواستیں خارج  کرنے کے فیصلے کو  سپریم کورٹ میں چیلنج کرنے کا اعلان کر دیا۔

تحریک انصاف کے چیئرمین بیرسٹر گوہر علی خان نے کہا ہے بانی پی ٹی آئی عمران خان سے پشاور ہائیکورٹ کے فیصلے پر بات ہوئی، سپریم کورٹ سے استدعا ہوگی لارجر بینچ بنا کر اپیل کو جلد سنے۔

بانی پی ٹی آئی سے ملاقات کے بعد چیئرمین پی ٹی آئی بیرسٹر گوہر علی نے اڈیالہ جیل کے باہر میڈیا سے گفتگو کرتے ہوئے کہا کہ  عمران خان کی طبعیت ٹھیک ہے،کے پی کے سے سینیٹ الیکشن کےبارے میں مشاورت کی۔

بیرسٹر گوہر نے کہا کہ آج کل میں امیدواروں کے ناموں کا اعلان کردیں گے، کے پی حکومت میں کمیٹی بنائیں گے جس میں شیر افضل مروت بھی شل ہوں گے، جن لوگوں سے زیادتی ہوئی ان کا کیسے مداوا کریں گے۔

پشاور ہائیکورٹ نے مخصوص نشستوں سے متعلق سنی اتحاد کونسل کی درخواستیں خارج کردیں

مخصوص نشستیں تب ملتی ہیں جب سیاسی جماعتوں نےسیٹ جیتی ہو، سنی اتحاد کونسل نے کوئی سیٹ جیتی ہی نہیں: پشاور ہائیکورٹ

انہوں نے اعلان کیا کہ 23 مارچ کو پی ٹی آئی جلسہ منعقد کرے گی، حکومت کی جیت کو جیت نہیں مانتے، یہ نتائج فارم 47 کی بنیاد پر آئے، سازش کے تحت ہمارے امیدواروں کو ری کاؤنٹنگ میں ہرانے کی کوشش جاری ہے، کئی کیسز ایسے ہیں جن کی دوبارہ گنتی کی کوشش جاری ہے،عدلیہ سے استدعا ہے اس عمل کو روکیں اس سے بدامنی پھیلے گی۔

واضح رہے کہ پشاور ہائیکورٹ نے مخصوص نشستوں سے متعلق سنی اتحاد کونسل کی درخواستیں خارج کردیں۔