کاکول اکیڈمی میں قومی کرکٹ ٹیم کے فٹنس کیمپ کیلئے 26 کھلاڑیوں نے رپورٹ کر دی
26 مارچ ، 2024
پاکستان کرکٹ ٹیم کے کاکول اکیڈمی ایبٹ آباد کے فٹنس کیمپ کیلئے 26 کھلاڑیوں نے رپورٹ کردی ہے،بابر اعظم، افتخار احمد اور نسیم شاہ کل رپورٹ کریں گے۔
پاکستان کرکٹ بورڈ کا آرمی کے تعاون سے قومی کھلاڑیوں کا فٹنس کیمپ ایبٹ آباد کی کاکول اکیڈمی میں لگایا گیا ہے۔
پی سی بی نے 29 کھلاڑیوں کو طلب کیا، جن میں سے 26 کھلاڑیوں نے کیمپ میں رپورٹ کردی ہے ، کھلاڑیوں کی آج فزیکل اسسمنٹ ہوئی جس کے بعد ٹریننگ کے گروپس اور شیڈول بنایا جائے گا۔
کیمپ میں باقاعدہ ٹریننگ کا آغاز بھی کل سے ہوگا، دو ہفتے پر مشتمل کیمپ میں کرکٹ کی کوئی سرگرمی نہیں ہوگی۔
عمرہ کی ادائیگی کے لیے سعودی عرب جانے والے بابراعظم ، افتخار احمد اور نسیم شاہ کی آج واپسی متوقع ہے یہ کھلاڑی کل کیمپ میں رپورٹ کریں گے۔
فٹنس کیمپ کل سے شروع ہوگا اور 8 اپریل تک جاری رہے گا ۔
