’ستھرا پنجاب مہم‘ کے باقی 3 دن رہ گئے، خود مریم نواز کے حلقے میں کچرے کے ڈھیر موجود

وزیراعلیٰ پنجاب مریم نواز کی اعلان کردہ ’ستھرا پنجاب مہم‘ ختم ہونے میں باقی تین دن رہے گئے لیکن خود مریم نواز کے حلقے سمیت کئی رہائشی علاقوں میں کچرے کے ڈھیر جوں کے توں موجود ہیں۔

وزیراعلیٰ پنجاب مریم نواز کی جانب سے پنجاب کو گندگی سے پاک کرنے کیلئے یکم مارچ سے 31 مارچ تک ’ستھرا پنجاب مہم‘ شروع کی گئی تھی جس کے تحت پورے پنجاب کے کھلے میدانوں، قبرستانوں اور اسکولوں کے باہر سے کوڑا اٹھایا جانا تھا۔

وزیر اعلی پنجاب نے یہ ٹاسک لوکل گورنمنٹ کو سونپا تھا، تاہم مہم ختم ہونے میں باقی تین روز رہ گئے لیکن وزیر اعلیٰ پنجاب کے اپنے حلقے میں بھی صورتحال بہتر نہ ہوسکی اور جگہ جگہ کوڑے کے ڈھیر اور ابلتے نالوں نے مہم کا پول کھول دیا۔

لاہور کے مختلف علاقے جن میں گلبرگ، محمود بوٹی، والٹن روڈ سمیت دیگر علاقے بھی ایسی ہی منظر کشی کر رہے ہیں۔

شہریوں کا کہنا ہے کہ کرین آئی تھی مگر ملازم نہیں آئے اور اگر آ بھی جائیں تو تصویریں بنا کر چلے جاتے ہیں۔

صوبائی وزیر لوکل گورنمنٹ ذیشان رفیق کا کہنا ہے کہ صفائی بہت مشکل کام ہے، خالی میدانوں میں 1000 کوڑے کے ڈھیروں میں سے 400 صاف کر لیے ہیں مزید کام بھی کریں گے۔

وزیراعلیٰ پنجاب نے اس مہم کی بنیاد پر سالڈ ویسٹ منیجمنٹ سسٹم کی مربوط حکمت عملی بنانے کا حکم جاری کیا تھا۔