دنیا

اسرائیلی وزیر دفاع کی غزہ جنگ کو مزید پھیلانے کی دھمکی

30 مارچ ، 2024

اسرائیلی فوج بیروت اور دمشق سمیت دیگر دور درواز کے علاقوں میں بھی کارروائیاں کرے گی: اسرائیلی وزیر دفاع/ فوٹو رائٹرز

اسرائیلی وزیر دفاع نے غزہ میں جاری جنگ کو مزید علاقوں تک پھیلانے کی دھمکی دے دی۔

اسرائیلی وزیر دفاع یوآو گیلنٹ نے کہا کہ اسرائیلی فوج حزب اللہ کے خلاف اپنی مہم کو مزید وسعت دے گی جس میں ہم ہر اس جگہ حملے کریں گے جہاں سے حزب اللہ کاررروائیاں کررہی ہے۔

اسرائیلی وزیر دفاع نے کہا کہ اسرائیلی فوج بیروت اور دمشق سمیت دیگر دور درواز کے علاقوں میں بھی کارروائیاں کرے گی۔

یہ بھی پڑھیں

دوسری جانب خلیجی میڈیا کا بتانا ہےکہ اسرائیلی فوج کے غزہ میں وحشیانہ حملے جاری ہیں جس میں اسرائیلی فوج نے ایک اسپورٹس سینٹر پر حملہ کیا جہاں بے گھر افراد نے پناہ لی ہوئی تھی، اسرائیلی فوج کے حملے میں 15 فلسطینی شہید ہوگئے۔

رپورٹس کے مطابق اسرائیلی فوج نے جمعہ اور ہفتے کی درمیانی شب سینٹرل غزہ میں حملے کیے جس میں متعدد بے گھر فلسطینی شہید ہوئے ہیں۔

اسرائیلی فوج نے سینٹرل غزہ کے نصیرت اورمغازی کیمپ میں رہائشی عمارتوں کو نشانہ بنایا جب کہ اسرائیلی فوج نے دیر البلاح کے علاقے میں بھی حملے کیے جسے محفوظ علاقہ بتایا گیا تھا۔

میدیا رپورٹس کے مطابق گزشتہ رات اسرائیلی فوج نے شمالی غزہ کے علاقوں میں بڑی تعداد میں فضائی حملے کیے۔

میڈیا رپورٹس میں بتایا گیا ہےکہ سول ڈیفنس اور طبی عملہ طبی آلات کی قلت کے باوجود زخمیوں کی جلد صحتیابی کے لیے کوششیں کررہا ہے۔

دوسری جانب اسرائیلی فوج کا کہنا ہےکہ اس نے الشفاء اسپتال میں اپنا آپریشن جاری رکھا ہوا ہے، اس آپریشن میں حماس کے متعدد جنجگوؤں کو مارا گیا ہے۔