آئی ایم ایف پاکستان کے ساتھ نئے پروگرام پر بات چیت کیلئے تیار

عالمی مالیاتی ادارے (آئی ایم ایف) نے پاکستان کے ساتھ نئے پروگرام پر بات چیت کا آغاز کرنے کیلئے آمادگی ظاہر کردی ہے۔

آئی ایم ایف کے ترجمان نے کہا ہے کہ پاکستان کے ساتھ آئندہ مہینوں میں نئے پروگرام پر بات کرنے کیلئے تیار ہیں۔

آئی ایم ایف کے ترجمان کا کہنا تھا کہ آئندہ ہفتوں میں پاکستانی ترقی سے متعلق پیش گوئی جاری کریں گے۔

اس سے قبل آئی ایم ایف کی کمیونیکیشن ڈائریکٹر جولی کوزیک نے کہا تھا کہ پہلا جائزہ مکمل ہونے کے بعد سے پاکستان کی اقتصادی اور مالیاتی صورتحال بہتر ہوئی ہے۔

ان کا کہنا تھا کہ اسٹینڈ بائے معاہدے کے تحت پاکستان کو 3 ارب ڈالر کی ادائیگی ہو گی، توقع ہے آئی ایم ایف بورڈ کی میٹنگ رواں ماہ کے آخر میں ہوگی۔

اس سے قبل وزیر اعظم پاکستان شہباز شریف نے خبردار کیا تھا کہ آئی ایم ایف پروگرام کی شرائط آسان نہیں ہوں گی۔

کابینہ کے اجلاس سے خطاب کرتے ہوئے وزیر اعظم نے کہا کہ اس مہینے آئی ایم ایف سے اگلی قسط مل جائے گی جبکہ آئی ایم ایف کے نئے پروگرام کیلئے وزیرخزانہ کی میٹنگ ہوگی، آئی ایم ایف پروگرام کیلئے شرائط آسان نہیں ہوں گی تاہم آئی ایم ایف پروگرام معیشت کی بحالی کیلئے نا گزیر ہے۔

واضح رہے کہ پاکستان کو آئی ایم ایف سے 7 سے 8 ارب ڈالر تک کا نیا قرض پروگرام ملنے کی امید ہے۔

ذرائع کے مطابق آئی ایم ایف نے کلائمیٹ فنانسنگ کیلئے مذاکرات کا بھی عندیہ دیدیا ہے اور قرض کے موجودہ دستیاب کوٹے میں اضافے کی بھی توقع ہے جبکہ نئے پروگرام کیلئے درخواست آئندہ ماہ دی جائے گی۔

ذرائع کا کہنا ہے کہ آئی ایم ایف سے باقاعدہ مذاکرات ایگزیکٹو بورڈ میٹنگ کے بعد ہوں گے اور آئی ایم ایف سے نئے تین سالہ قرض پروگرام کیلئے مذاکرات دو سے تین ماہ جاری رہنے کا امکان ہے جبکہ نئے مالی سال کا بجٹ بھی آئی ایم ایف کی شرائط کے مطابق تیار کرنا ہوگا۔