رمضان المبارک

جمعہ کے دن درودِ پاک پڑھنا

05 اپریل ، 2024

جمعہ کے دن درود پاک کی کثرت کرنی چاہیے/ فائل فوٹو

سوال: ہماری مسجد کے امام صاحب فجر کے بعد درس دیتے ہیں، چند دن قبل انہوں نے درودِپاک کی فضیلت پر درس دیا اور اس میں یہ بات بھی انہوں نے کہی کہ جمعہ کے دن درود کی کثرت کرنی چاہیے ، یہ رسول اللہ ﷺکا حکم ہے اور ساتھ ہی کہا کہ ہر امتی کا درود نبی پاک ﷺتک پہنچایا جاتا ہے اور تمام انبیائے کرام علیہم السلام کے جسد اطہر ہمیشہ محفوظ رہتے ہیں، کیا یہ درست ہے ؟

جواب: مذکورہ امام صاحب کی ذکر کردہ بات درست ہے، جمعہ کے دن درود پاک کی کثرت کرنی چاہیے، علمائے کرام نے درود پاک کی فضیلت پر مستقل کتب لکھی ہیں، چنانچہ سنن ابو داؤد، سنن نسائی اور سنن ابن ماجہ میں رسول اللہ ﷺکا یہ ارشاد موجود ہے ، آپ ﷺ نے فرمایا:’’بے شک، تمہارے افضل ترین ایام میں سے ”یومِ جمعہ“ ہے، اس میں حضرت آدم علیہ الصلوٰۃ والسلام کو پیدا کیا گیا، اسی روز ان کی وفات ہوئی، اسی روز ”نفخۂ اولیٰ“ ہوگا اور اسی روز میں ”نفخۂ ثانیہ“ ہوگا، اس جمعہ کے روز تم لوگ کثرت کے ساتھ مجھ پر درود بھیجاکرو، کیوں کہ تمہارا درودوسلام مجھ پر پیش کیا جاتا ہے۔

راوی کہتے ہیں کہ: صحابۂ کرام نے سوال کیا : یا رسول اللہﷺ !بعد ِوفات (دیگر اموات کی طرح ) آپ بھی تو ریزہ ریزہ ہوجائیں گے، پھر ہمارا درود آپ پر کیسے پیش کیا جائے گا؟ پس آپ ﷺنے فرمایا: اللہ تعالیٰ نے زمین پر حضراتِ انبیاء علیہم السلام کے اجسام کو حرام کردیا ہے، زمین انہیں کھا نہیں سکتی، فنا نہیں کرسکتی‘‘۔

یہ ہم نے سنن ابو داؤد میں حضرت اوس بن اوسؓ سے منقول روایت کا ترجمہ تحریر کیا ہے۔ یہی روایت دیگر کتب میں بھی موجود ہے۔