والد اور عمران خان کو نماز عید سے روکا گیا، اپنے اپنے سیل میں رکھا گیا: مہر بانو
16 اپریل ، 2024
پاکستان تحریک انصاف کے رہنما شاہ محمود قریشی کی بیٹی مہربانو قریشی نے کہا ہے کہ والد اور بانی پی ٹی آئی عمران خان نے باجماعت نماز عید ادا نہیں کی۔
میڈیا سے گفتگو میں مہربانوقریشی کا کہنا تھاکہ بانی پی ٹی آئی اور شاہ محمود قریشی کو اپنے اپنے سیل میں رکھا گیا ہے، عید کے روز کھانا گھر سے لے کر گئے تھے مگر 4 بجے تک ملاقات کے دوران کھانا نہیں کھا سکے۔
انہوں نے کہا کہ پہلے ملاقات میں ڈیسک ہوتا تھا لیکن اب درمیان میں شیشہ لگا دیا گیا ہے، پہلے والد کا ہاتھ چوم لیتے تھے اب ہاتھ بھی نہیں چوم سکتے، اتنی مشکلات کا سامنا کیا کہ اب تو عادت سی ہو گئی ہے۔
ان کا کہنا تھاکہ یہ درست نہیں ہے کہ ایک مسلمان کو نماز عید سے روکا جائے، سابق وزیراعظم اور سابق وزیرخارجہ کو نمازعید سے روکا گیا، کشمیرکے مسلمانوں کا دکھ کرتے ہیں لیکن ہمیں بھی نمازعید نہیں پڑھنے دی گئی۔
