17 اپریل ، 2024 
190 ملین پاؤنڈ کیس میں مزید 9 گواہوں کے بیانات ریکارڈ، 13 گواہوں پر جرح مکمل
17 اپریل ، 2024
پاکستان تحریک انصاف کے بانی عمران خان اور ان کی اہلیہ بشریٰ بی بی کے خلاف 190 ملین پاؤنڈ کیس میں آج مزید 9 گواہوں کے بیانات ریکارڈ کرلیے گئے۔
احتساب عدالت کے جج ناصرجاوید رانا نے اڈیالہ جیل میں 190 ملین پاؤنڈ اسکینڈل ریفرنس پر سماعت کی۔
دوران سماعت بانی پی ٹی آئی عمران خان اور بشریٰ بی بی کمرہ عدالت میں موجود رہے اور ان کی جانب سے وکلا ظہیر چوہدری، عثمان گل اورعلی ظفر پیش ہوئے۔
ڈپٹی پراسیکیوٹرنیب مظفرعباسی اور پراسیکیوٹر امجد پرویزعدالت میں پیش ہوئے۔
نیب کی جانب سے آج مزید 9 گواہان کو پیش کیا گیا اور بیانات ریکارڈ کیے گئے جس کے بعد مجموعی طورپرنیب کے15 گواہان کے بیانات قلمبند ہوگئے اور 13 پرجرح مکمل ہوگئی۔
بشریٰ بی بی کی جانب سے طبی معائنے کی درخواست دائرکی گئی جس پر عدالت نے ڈاکٹرعاصم یونس سے بشریٰ بی بی کا طبی معائنہ کرانے کا حکم دیا۔ عدالت نے حکم دیا کہ کل 18 اپریل دن 12 بجے تک بشریٰ بی بی کا طبی معائنہ کرایا جائے۔
عدالت نے آئندہ سماعت پر مزید 6 گواہان کو طلب کرتے ہوئے سماعت 19 اپریل تک ملتوی کردی۔
