17 اپریل ، 2024 
رجیم چینج میں سعودی مداخلت کا بیان میرے ذاتی خیالات پرمبنی تھا: شیر افضل کی وضاحت
17 اپریل ، 2024
پاکستان تحریک انصاف کے رہنما شیر افضل مروت نے رجیم چینج میں سعودی عرب کی مداخلت سے متعلق بیان پر وضاحت جاری کردی۔
گزشتہ روز نجی ٹی وی کے پروگرام میں شیر افضل مروت نے کہا تھا کہ رجیم چینج آپریشن میں سعودی عرب بھی ملوث تھا، سعودی عرب اور امریکا کے تعاون سے رجیم چینج آپریشن ہوا۔
انہوں نے کہا کہ پاکستان میں جتنی بھی سرمایہ کاری آ رہی ہے وہ اسی منصوبہ بندی کا حصہ ہے۔
تاہم پی ٹی آئی کی جانب سے اظہار لاتعلقی کے بعد شیر افضل مروت نے بھی اپنے بیان کی وضاحت جاری کردی۔
انہوں نے کہا کہ لائیو شو میں میرا بیان میرے ذاتی خیالات پرمبنی تھا۔ ان کا کہنا تھاکہ انٹرویو میں دعویٰ نہیں کیاکہ اس مؤقف کو پی ٹی آئی کی حمایت حاصل ہے۔
واضح رہے کہ گزشتہ روز ہی سعودی وزیر خارجہ کی سربراہی میں اعلیٰ سطح کے سعودی وفد نے پاکستان کا دورہ کیا تھا اور سرمایہ کاری میں دلچسپی کا اظہار کیا۔
