پی ٹی آئی کی صدر زرداری کے پارلیمنٹ کے مشترکہ اجلاس سے خطاب پر شدید تنقید

پاکستان تحریک انصاف کے رہنماؤں نے صدر پاکستان آصف علی ذرداری کے پارلیمنٹ کے مشترکہ اجلاس سے خطاب پر شدید تنقید کی ہے۔

تحریک انصاف کے رہنماؤں نے صدرکے خطاب کے بعد پارلیمنٹ کے باہر میڈیا سے گفتگو کی۔

اس موقع پر پی ٹی آئی رہنما عمر ایوب نے کہا کہ آج یہاں ایک غیرقانونی صدر کا خطاب آپ سب نے سنا، میں نے بحیثیت اپوزیشن لیڈر پوائنٹ اٹھانے کی کوشش کی، قانون ہے کہ جس وقت بھی اپوزیشن لیڈر اٹھے گا اسے فلور دیا جاتا ہے، اس ایوان میں قانون کی دھجیاں اڑائی جارہی ہیں۔

اس کے علاوہ پی ٹی آئی چیئرمین بیرسٹر گوہر نے کہا کہ آج کے اجلاس میں ہم نے زرداری کو 21 توپوں کے احتجاج کی سلامی پیش کی، یہ لوگ عہدے بانٹتے ہیں، آج کا بھر پور احتجاج ہمارا حق تھا، ہم اس صدر کو نہیں مانتے، یہ صدر، وزیراعظم پوری کابینہ ہی غیر قانونی ہے۔

اختلافات لیکر نہیں چل سکتے، ملک کو سیاسی بحران سے نکالنا ہوگا: صدرکا پارلیمنٹ کے مشترکہ اجلاس سے خطاب

ملک کو حالیہ سیاسی بحران سے نکالنے کی ضرورت ہے، ہمارے پاس وقت بہت کم ہے، ہمارا ایجنڈا اور خیالات ہی ملک کو مضبوط بنائیں گے: صدر زرداری

بیرسٹر گوہر نے دعو ی کیا کہ ہم نے صدر پاکستان کو تقریر ادھوری چھوڑنے پر مجبور کر دیا۔

واضح رہے کہ جمعرات کو صدر مملکت آصف علی زرداری نے پارلیمنٹ کے مشترکہ اجلاس سے خطاب کیا، اس  کے دوران اپوزیشن کی جانب سے احتجاج اور شور شرابا بھی کیا گیا۔

تحریک انصاف کے ارکان بانی پی ٹی آئی عمران خان کے پوسٹر اٹھائےایوان میں موجود رہے۔