23 اپریل ، 2024 
پارٹی رہنما عمران کو مجبور کر رہے تھے چیئرمین پی اے سی کیلئے نام تبدیل کریں: شیرافضل کا دعویٰ
23 اپریل ، 2024
پاکستان تحریک انصاف کے رہنما شیر افضل مروت نے دعویٰ کیا ہے کہ پارٹی رہنما عمران خان کو پبلک اکاؤنٹس کمیٹی (پی اے سی) کی چیئرمین شب کیلئے میرا نام تبدیل کرنے پر زور دیتے رہے تاہم انہوں نے رہنماؤں کی چال انہی پر الٹ دی۔
جیو نیوز سے گفتگو میں شیر افضل مروت کا کہنا تھاکہ پبلک اکاؤنٹس کمیٹی کے نام پر پارٹی کے اپنے رہنماؤں نے غلط بیانی کی، ایک ہفتے قبل پارٹی کے دوست بانی پی ٹی آئی سے ملے اور انہیں یہ باور کروا رہے تھے کہ پی اے سی چیئرمین کا اسپیکر نہیں مان رہے۔
انہوں نے کہا کہ بانی پی ٹی آئی پرپارٹی رہنماؤں نے زور دیا کہ متبادل کا نام دیں لیکن عمران خان نے ان رہنماؤں کی چال انہی پر الٹ دی۔
ان کا کہنا تھاکہ یہ روایت ہے چیئرمین پی اے سی کو اپوزیشن نامزد کرتی ہے، اسپیکر مجھے چیئرمین پی اے سی نامزد نہیں کرتے تو اپوزیشن کوئی کمیٹی نہیں لے گی۔
شیر افضل مروت کا کہنا تھاکہ بانی پی ٹی آئی کا مجھ پر مکمل اعتماد ہے، پارٹی کے اندر جو بھی یہ کر رہے ہیں اپنا قد چھوٹا کر رہے ہیں، بانی پی ٹی آئی نے میرا نام لیا، اب یہ رہنما مجبور کر رہے تھے نام تبدیل کریں، بہت سے فیصلوں میں بانی پی ٹی آئی پر دباؤ ڈالا گیا۔
انہوں نے کہا کہ اسپیکر قومی اسمبلی کو میرے نام پر کوئی اعتراض نہیں تھا۔
خیال رہے کہ گزشتہ دنوں پاکستان تحریک انصاف کے بانی چیئرمین عمران خان نے پارلیمنٹ کی پبلک اکاؤنٹس کمیٹی کے چیئرمین کیلئے شیر افضل مروت کا نام تجویز کیا تھا۔
