16 ویں چیف آف نیول اسٹاف انٹرنیشنل اسکواش چیمپئن شپ کراچی میں شروع ہوگئی
08 مئی ، 2024
16 ویں چیف آف نیول اسٹاف انٹرنیشنل اسکواش چیمپئن شپ کراچی میں شروع ہوگئی۔
روشن خان جہانگیر خان اسکواش کمپلیکس میں 16 ویں چیف آف نیول اسٹاف انٹرنیشنل اسکواش چیمپئن شپ کی افتتاحی تقریب ہوئی جہاں کمانڈر کراچی رئیر ایڈمرل ہلال امتیاز ملٹری محمد سلیم نے بطور مہمان خصوصی چیمپئن شپ کا افتتاح کیا۔
اس موقع پر لیجنڈ جہانگیر خان بھی موجود تھے ، چیمپئن شپ میں 9 ممالک کے 24 کھلاڑی شرکت کر رہے ہیں جس میں پانچ پاکستانی اور 19 غیر ملکی کھلاڑی شامل ہیں۔
پہلے روز پاکستان کے وائلڈکارڈ پر انٹری دینے والے ناصر اقبال نے ملائیشیا کے سیڈڈ کھلاڑی ڈیرن پراگسام کو گیارہ نو، گیارہ پانچ اور گیارہ دس سے اپ سیٹ شکست دی۔
افتتاحی میچ میں ملائیشیا کے شفیق کمال اور مصر کے ہضیم ہوشام کے درمیان سنسنی خیز مقابلہ ہوا جو پانچ سیٹ تک جاری رہا۔ ملائیشین کھلاڑی نے پانچواں سیٹ جیت کر کامیابی حاصل کی۔
دیگر میچز میں ہانگ کانگ جاپان، ملائیشیا، انگلینڈ کےکھلاڑیوں نےکامیابی حاصل کی۔
چیمپئن شپ کی انعامی رقم 20 ہزار ڈالر پر مشتمل ہے، چیمپئن شپ میں پاکستان کے انڈر 15 بوائز گرلز اور انڈر13 بوائز کے بھی مقابلے ہوئے۔
