Time 18 مئی ، 2024
انٹرٹینمنٹ

وزیراعلیٰ بلوچستان سرفراز بگٹی نے ماہرہ خان سے کس بات پر معافی مانگی؟

سرفراز بگٹی نے ایک تقریب کے دوران ماہرہ خان کے ساتھ پیش آئے افسوسناک واقعے کا ذکر بھی کیا/فوٹوفائل
سرفراز بگٹی نے ایک تقریب کے دوران ماہرہ خان کے ساتھ پیش آئے افسوسناک واقعے کا ذکر بھی کیا/فوٹوفائل

وزیر اعلیٰ بلوچستان میر سرفراز بگٹی نے  پاکستان لٹریچر فیسٹیول ( پی ایل ایف) کے دوران اداکارہ ماہرہ خان کے اوپر پھینکی جانے والی چیز کے معاملے پر ان سے  معافی مانگی۔

ایک تقریب سے خطاب کے دوران سرفراز  بگٹی نے ماہرہ خان کے ساتھ پیش آئے واقعے کا ذکر کرتے ہوئے کہا کہ ایک انفرادی شخص نے ماہرہ خان کے ساتھ جو کیا میں اس کی مذمت کرتا ہوں۔

ماہرہ خان سے معافی مانگتے ہوئے وزیراعلیٰ بلوچستان کا کہنا تھا کہ بحیثیت بلوچستانی میں شرمندہ ہوں اور ماہرہ خان آپ سے معافی کا طلب گار ہوں، ایک انسان پورے بلوچستان کا نمائندہ نہیں ہے وہ صرف ایک انفرادی شخص ہے۔

واضح رہے کہ ماہرہ نے حال ہی میں کوئٹہ میں کراچی آرٹس کونسل آف پاکستان کی جانب سے منعقد کیے گئے پاکستان لٹریچر فیسٹیول میں شرکت کی تھی جہاں انہوں نے اپنے مداحوں سے ملاقات بھی کی تھی۔

اسی تقریب کی ایک ویڈیو وائرل ہوئی تھی جس میں دیکھا گیا کہ اسٹیج پر بیٹھی ماہرہ خان کے اوپر ایک شخص کی جانب سے کچھ پھینکا گیا۔