ایران کے نئے سربراہ سے متعلق سپریم لیڈر کا بیان سامنے آگیا

ایران کے سپریم لیڈرآیت اللہ خامنہ ای نے صدر ابراہیم رئیسی اور حادثے کا شکار ہیلی کاپٹر میں سوار دیگر افراد کے انتقال پر تعزیت کا اظہار کیا ہے۔

ایران کے سپریم لیڈر آیت اللّٰہ خامنہ ای نے کہا کہ سید ابراہیم رئیسی مجاہد عالم اور عوامی صدر تھے، اس عظیم شخص نے ذمہ داری سنبھالی، خود کو لوگوں، ملک اور اسلام کیلئے وقف رکھا۔

آیت اللّٰہ خامنہ ای نے تعزیتی پیغام میں کہا کہ ایرانی قوم جاں نثار اور مخلص شخصیت سے محروم ہوگئی، ابراہیم رئیسی کیلئے عوام کی خدمت ہر چیز سے بالاتر تھی، بعض بدخواہوں کے طنز بھی انہیں امور بہتر کرنے سے نہ روک سکے۔

آیت اللّٰہ خامنہ ای نے کہا کہ آیت اللّٰہ آل ہاشم نماز جمعہ کے محبوب اور قابل احترام پیش امام تھے اور عبداللہیان محنتی اور فعال وزیر خارجہ تھے، مالک رحمتی مشرقی آذربائیجان کے انقلابی گورنر تھے۔

سپریم لیڈر نے کہا کہ وہ ابراہیم رئیسی کی قابل احترام والدہ کو دلی تعزیت پیش کرتے ہیں اور ابراہیم رئیسی کی نیک و عظیم اہلیہ کو بھی دلی تعزیت پیش کرتے ہیں۔

آیت اللّٰہ خامنہ ای کا کہنا تھا کہ وہ آل ہاشم کے انتہائی محنتی والد کو بھی دلی تعزیت پیش کرتے ہیں، وہ اہل خانہ کیلئے صبر اور مرحومین کی ارواح کیلئے اللّٰہ کے رحم کی دعا کرتے ہیں۔

ایرانی صدر ابراہیم رئیسی اور وزیر خارجہ ہیلی کاپٹر حادثے میں جاں بحق

ایرانی سپریم لیڈر آیت اللہ خامنہ ای کے ترجمان آیت اللہ علی ہاشم اور مشرقی آذربائیجان کے گورنر مالک رحمتی بھی اس ہیلی کاپٹر میں سوار تھے

ایرانی سپریم لیڈر نے کہا کہ ایرانی صدر ابراہیم رئیسی کے انتقال کے بعد پہلے نائب صدر محمد مخبر آئین کے مطابق ایگزیکٹو برانچ کے انچارج ہیں اور محمد مخبر کو عدلیہ اور قانون ساز اداروں کے سربراہوں کی ہم آہنگی سے 50 دنوں کے اندر انتخابات کرانے ہوں گے۔

آیت اللہ خامنہ ای نے ایرانی صدر ابراہیم رئیسی اور وزیر خارجہ امیر عبداللہیان اور دیگر رہنماؤں کی ہیلی کاپٹر حادثے میں انتقال پر ملک میں 5 روزہ قومی سوگ کا بھی اعلان کیا ہے۔

واضح رہے کہ گزشتہ شب خراب موسمی حالات کے سبب ایرانی صدر کا ہیلی کاپٹر دیزمر جنگل میں کریش ہوا، حادثہ ضلع اُوزی اور پیر داؤد قصبے کے درمیانی علاقے میں پیش آیا۔

میڈیا رپورٹس کے مطابق ہیلی کاپٹر حادثے کی وجہ شدید دھند اور بارش کو قرار دیا گیا ہے، پرواز کے آدھے گھنٹے بعد صدارتی ہیلی کاپٹر کا دیگر 2 ہیلی کاپٹروں سے رابطہ منقطع ہوا۔

ایرانی صدر ابراہیم رئیسی ڈیم کے افتتاح کے بعد واپس تبریز جا رہے تھے، ڈیم کی افتتاحی تقریب میں آذربائیجانی صدر نے بھی شرکت کی تھی۔

حادثے کا شکار ہونے والے ہیلی کاپٹر میں صدر رئيسی کے ساتھ ایرانی وزير خارجہ حسین امیرعبداللہیان، مشرقی آذر بائيجان کے گورنر مالک رحمتی اور ایرانی سپریم لیڈر کے ترجمان بھی سوار تھے۔