مائیکرو سافٹ کا اے آئی کمپیوٹرز کو پائلٹ پلس متعارف کرانے کا اعلان

کئی ماہ سے ایسی رپورٹس سامنے آ رہی تھیں کہ مائیکرو سافٹ کی جانب سے آرٹی فیشل انٹیلی جنس (اے آئی) کمپیوٹرز کی تیاری پر کام کیا جا رہا ہے۔

اب کمپنی کی جانب سے ایک ایونٹ کے دوران اس حوالے سے اعلان کیا گیا ہے۔

مائیکرو سافٹ نے کو پائلٹ پلس نامی کمپیوٹرز متعارف کرانے کا اعلان کیا ہے جو کہ نئی طرح کے ونڈوز کمپیوٹرز ہوں گے۔

ان کمپیوٹرز یا لیپ ٹاپس میں ایسے ہارڈ وئیر کو استعمال کیا جائے گا جو جنریٹیو اے آئی کو پائلٹ ماڈل کو کلاؤڈ کی بجائے مشین کے اندر ہی پراسیس کرنے کی صلاحیت رکھتے ہوں گے۔

اس مقصد کے لیے ایسے چپ سیٹ کی ضرورت ہوگی جو نیورل پراسیسنگ یونٹ (این پی یو) سے لیس ہو۔

اس مقصد کے لیے مائیکرو سافٹ نے کمپیوٹرز تیار کرنے والی کمپنیوں کے ساتھ ساتھ چپس بنانے والے اداروں سے بھی اشتراک کیا ہے۔

اولین کو پائلٹ پلس لیپ ٹاپس 18 جون سے مختلف ممالک میں دستیاب ہوں گے۔

مائیکرو سافٹ کے کنزیومر چیف مارکیٹنگ آفیسر یوسف مہدی نے بتایا کہ کمپنی کی جانب سے ونڈوز کمپیوٹرز کو مکمل طور پر بدلا جا رہا ہے۔

انہوں نے دعویٰ کیا کہ کو پائلٹ پلس کمپیوٹرز اب تک سب سے طاقتور ترین کمپیوٹرز ہوں گے۔

انہوں نے بتایا کہ طاقتور ترین ہونے کے باوجود یہ کمپیوٹرز بہت زیادہ پتلے اور ہلکے وزن کے ہوں گے۔

ایسے کمپیوٹرز میں کم از یم ریم 16 جی بی ہوگی جبکہ اسٹوریج 256 جی بی ہوگی جو فی سیکنڈ 40 Tera آپریشنز کرسکیں گے۔

یوسف مہدی کے مطابق کو پائلٹس پلس کمپیوٹرز ایپل کے میک بک ائیرز کے مقابلے میں 58 فیصد زیادہ تیز ہوں گے جبکہ اے آئی لیپ ٹاپس میں مسلسل 22 گھنٹے تک ویڈیوز کو بغیر چارج کیے چلانا ممکن ہوگا۔

ان ڈیوائسز میں 40 سے زائد اے آئی ماڈلز موجود ہوں گے جن کو ونڈوز 11 کا حصہ بنایا جائے گا تاکہ ہارڈ وئیر اور سافٹ وئیر افعال کی افادیت بہتر ہوسکے۔

مائیکرو سافٹ کی جانب سے ایک نیا فیچر ری کال بھی متعارف کرایا جا رہا ہے جو کہ ونڈوز 10 کے ٹائم لائن فیچر کا جدید ترین ورژن ہے۔

اس کے ذریعے آپ اپنے کمپیوٹرز میں ایپس، ڈاکومینٹس اور میسجز میں اسکرول کر سکیں گے۔

ایک نئی کو پائلٹ ایپ بھی ونڈوز کمپیوٹرز کا حصہ بنائی جا رہی ہے جسے ایک الگ ونڈو، سائیڈ بار یا فل اسکرین پر استعمال کرنا ممکن ہوگا۔