21 مئی ، 2024
انسداد دہشت گردی گوجرانوالہ کی عدالت نے وزیرآباد میں لانگ مارچ کے دوران بانی پی ٹی آئی عمران خان پر قاتلانہ حملے میں ملوث مرکزی ملزم نوید سمیت تین ملزمان پر فرد جرم عائد کر دی۔
اے ٹی سی گوجرانوالہ میں مقدمے کی سماعت شروع ہوئی تو گرفتار ملزم نوید کو پولیس نے عدالت میں پیش کیا۔
ضمانت پر رہا دو ملزمان وقاص اور طیب بٹ بھی عدالت میں پیش ہوئے۔ عدالت میں فرد جرم پڑھ کر ملزمان کو سنائی گئی تو ملزمان نے صحت جرم تسلیم کرنے سے انکار کیا۔
تاہم ملزمان پر قتل، اقدام قتل، دہشت گردی سمیت 17 سنگین دفعات کے تحت فرد جرم عائد کی گئی۔
مرکزی ملزم نوید پر فائرنگ کرنے جبکہ دیگر دو ملزمان پر اسلحہ فراہمی اور سہولت کار کا الزام ہے۔
عدالت نے کیس کی سماعت 25 مئی تک ملتوی کردی۔