شاہد آفریدی کا ورلڈکپ کے بعد پاکستانی ٹیم کی اندرونی کہانی سامنے لانے کا اعلان

پاکستان کرکٹ ٹیم کے سابق کپتان شاہد آفریدی کا کہنا ہے کہ وہ  ٹی ٹوئنٹی ورلڈ کپ میں موجودہ اسکواڈ کے حوالے سے اندرونی کہانی جلد عوام کے سامنے لائیں گے۔

ایک مقامی ٹی وی چینل کو انٹرویو دیتے ہوئے شاہد آفریدی سے ٹیم میں اتحاد نہ ہونے کے بارے میں سوال کیا گیا، جس کے جواب میں سابق کپتان نے  مہمانوں کے پینل میں موجود محمد وسیم کی طرف اشارہ کیا۔

محمد وسیم کی جانب اشارہ کرتے ہوئے شاہد آفریدی نے کہا کہ 'یہ بہت ساری چیزیں جانتے ہیں اور میں بھی لیکن ہم کھل کر بات نہیں کر سکتے'۔

ویڈیو: میچ جتوانے کی سرتوڑ کوشش کرنیوالے نسیم بھارت سے شکست پر پھوٹ پھوٹ کر رو پڑے

نسیم شاہ کو ناصرف ساتھی کرکٹر شاہین آفریدی نے دلاسہ دیا بلکہ بھارتی کرکٹرز بھی نسیم شاہ سے ملتے ہوئے ان کا کاندھا تھپتھپاتے رہے

انہوں نے بات جاری رکھتے ہوئے کہا کہ 'ٹیم کی ہم آہنگی، اتحاد اور کھلاڑی ایک دوسرے کے ساتھ کیسے ہیں، اس کی ذمہ داری کپتان پر عائد ہوتی ہے، کپتان یا تو مثبت ماحول بناتا ہے یا اسے بگاڑ دیتا ہے'۔

شاہد آفریدی کا کہنا تھا کہ 'ٹیم مینجمنٹ اور کوچز سے پہلے کپتان ہی ٹیم کو متحد کرتا ہے، اس کے پاس اختیار ہوتا ہے جب کہ اسے سلیکشن کمیٹی سپورٹ کرتی ہے، میدان پر ٹیم لڑانے کا کام کپتان کا ہے'۔

سابق کپتان نے مزید کہا کہ 'شاہین کے ساتھ میرا رشتہ کسی اور قسم کا ہے، اگر میں کوئی بات کروں گا تو لوگ کہیں گے کہ اپنے داماد کو سپورٹ کر رہا ہوں حالانکہ میں ایسا نہیں ہوں، اگر میری بیٹی، بیٹا یا داماد غلط ہیں تو میں انہیں بھی غلط کہوں گا'۔

آئی سی سی ٹی ٹوئنٹی ورلڈ کپ، پاکستان ٹیم کا سفر اگر مگر کا شکار

دو میچز ہارنے کے بعد پاکستان ٹیم کی سپر 8 رسائی دوسری ٹیموں پر منحصر ہوگئی

انہوں نے کہا کہ 'پچھلے کچھ عرصے میں ہماری سلیکشن کمیٹی اور بورڈ نے بڑی غلطیاں کی ہیں، ورلڈکپ کے بعد کھل کر بات کروں گا، ہمارے لوگوں نے خود اسی یونٹ کو خراب کیا ہے'۔

واضح رہے کہ 9 جون بروز  اتوار کو ہونے والے آئی سی سی ٹی ٹوئنٹی ورلڈکپ کے میچ میں بھارت نے پاکستان کو 6 رنز سے شکست دی، پاکستان 120 رنز کا آسان ہدف بھی حاصل کرنے میں ناکام رہا۔