مجھ پر کسی نے دباؤ نہیں ڈالا: چیف جسٹس سندھ ہائیکورٹ

کراچی: چیف جسٹس سندھ ہائیکورٹ عقیل عباسی نے کہا ہےکہ خدا کی رحمت سے مجھ پر کسی نے دباؤ نہیں ڈالا۔

کراچی میں میڈیا سے گفتگو کے دوران چیف جسٹس سندھ ہائیکورٹ نے عدلیہ پر دباؤ اور مداخلت کے الزامات میں حقیقت کے حوالے سے سوال کا جواب دیتے ہوئے کہا کہ واضح طور پر کہتا ہوں مجھ سے کسی نے رابطہ نہیں کیا، کچھ کوششیں ایسی ضرور ہوئیں لیکن خدا کی رحمت سے مجھ پر کسی نے دباؤ نہیں ڈالا، میرا گمان ہے جج کرپٹ اور بے ایمان نہیں ہوسکتا۔

عدلیہ اسٹیبلشمنٹ کی مداخلت سے جان چھڑانے کیلئے جدوجہد کررہی ہے: چیف جسٹس لاہور ہائیکورٹ

عدلیہ میں مداخلت میں مختلف ادارے ملوث ہیں اور اس مداخلت کا آغاز مولوی تمیز الدین کیس سے ہوا: جسٹس ملک شہزاد

انہوں نے کہا کہ عدلیہ کی آزادی اس کے فیصلوں سے نظر آتی ہے، ایک دو بار کچھ ایسی کوشش ہوئی جس کا فوری سدباب کیا وہ بھی بعد میں غلط فہمی ثابت ہوئی۔

جسٹس عقیل عباسی کہنا تھا کہ سندھ کی عدلیہ پر کسی مخصوص کیس میں دباؤ ڈالنے کی کوشش نہیں کی گئی، الیکشن ٹربیونل کے جج کا تبادلہ معمول کی کارروائی تھی، ججز کے تبادلے کا نظام بہت پیچیدہ ہے۔