نرسنگ ہوم میں محبت، 23سالہ دوشیزہ نے 80 سالہ شخص سے شادی کرلی

چین میں 23 سالہ دوشیزہ نے والدین سمیت خاندان بھر کی نفرت مول لیتے ہوئے 80 سالہ شخص سے شادی رچا لی۔

غیر ملکی خبر رساں ادارے کے مطابق محبت کی یہ انوکھی کہانی چین کے صوبے ہیبی کے نرسنگ ہوم میں شروع ہوئی جہاں 23 سالہ ژیاؤفانگ رضاکارانہ طور پر کام کر رہی تھی کہ اس دوران  ان کی ملاقات 80 سالہ مسٹر لی سے ہوئی۔

مسٹر لی اور  ژیاؤفانگ کے ایک جیسے مشاغل اور دلچسپیاں جلد ہی دونوں کی دوستی کی وجہ بن گئیں اور وقت کے ساتھ ساتھ کم عمر دوشیزہ مسٹر لی کی دانشمندی سے متاثرہوکر ان سے محبت کر بیٹھیں اور دونوں نے شادی کا فیصلہ کر لیا۔

ژیاؤ فانگ کے اہلخانہ بیٹی کی ان کے دادا کی عمر کے شخص کیساتھ شادی کی لیے رضامند نہ ہوئے لیکن اس کے باوجود جوڑے نے علیحدگی کے بجائے ایک دوسرے کے ساتھ رہنے کا فیصلہ کیا۔

چینی ویب سائٹ سوہو کے مطابق غیر معمولی جوڑے نے حال ہی میں ایک سادہ سی تقریب میں شادی کرلی ہے، جس میں لڑکی کے خاندان میں سے کوئی بھی شریک نہ ہوا۔

سوشل میڈیا پر دوشیزہ کی ایک ضعیف شخص سے شادی نے کئی سوالات کو جنم دے دیا ہے۔

متعدد صارفین نے دوشیزہ پر الزام لگایا کہ انھوں نے مسٹر لی سے شادی پیسوں کی خاطر کی ہے تاہم رپورٹس بتاتی ہیں کہ مسٹر لی اپنا گزر بسر  پنشن پر کرتے ہیں اور وہ کسی جائیداد کے مالک نہیں ہیں۔

ژیاؤ فانگ کو مسٹر لی سے شادی کی صورت مالی ذمہ داری بھی خود اٹھانی پڑے گی لیکن اس سب کے باوجود ژیاؤ فانگ اس رشتے کو بخوبی نبھانے کو تیار ہیں۔

دوسری جانب غیر معمولی جوڑے کی رومانوی تصویریں بھی سوشل میڈیا پر تیزی سے وائرل ہو رہی ہیں۔