مائیکل وان نے افغانستان کو ایشیا کی دوسری بہترین ٹیم قرار دے دیا

سابق انگلش کپتان مائیکل وان نے گزشتہ سال ورلڈکپ میں پاکستان کو اور اب  ٹی ٹوئنٹی ورلڈکپ میں آسٹریلیا کو شکست دینے والی افغانستان ٹیم کو ایشیا کی دوسری بہترین کرکٹ ٹیم قرار دے دیا۔

 مائیکل وان کا خیال ہے کہ افغانستان کی کرکٹ ٹیم پاکستان اور سری لنکا سے کافی بہتر  ہے۔

اتوار کو آئی سی سی مینز ٹی ٹوئنٹی ورلڈ کپ میں سپر 8 مرحلے کے میچ میں افغانستان نے آسٹریلیا کو 21 رنز سے شکست دے کر تاریخ رقم کردی۔

افغانستان نے پہلی بار آسٹریلیا کو شکست کا مزہ چکھایا۔

افغانستان نے ٹی ٹوئنٹی ورلڈکپ میں تاریخ رقم کردی، آسٹریلیا کو سپر 8 مرحلے کے میچ میں شکست

افغان کرکٹ ٹیم نے پہلے بیٹنگ کرتے ہوئے آسٹریلیا کو جیتنے کیلئے 149 رنز کا ہدف دیا تھا جس کے جواب میں کینگروز 127 رنز پر ڈھیر ہوگئی

آسٹریلیا کے خلاف شاندار کامیابی کے بعد سابق انگلش کپتان مائیکل وان نے سوشل میڈیا پر بیان جاری کرتے ہوئے افغانستان ٹیم کی تعریف کی اور راشد خان کی کپتانی کو بھی سراہا۔

ایکس پر ایک صارف کی ٹوئٹ پر جواب دیتے ہوئے مائیکل وان نے افغانستان کو ایشیا کی دوسری وائٹ بال کرکٹ کی بہترین ٹیم قرار دیا۔

واضح رہے کہ آسٹریلیا کو شکست دینے کےبعد افغانستان کرکٹ ٹیم نے سپر8 مرحلے کے گروپ 1 سے سیمی فائنل میں پہنچنے کیلئے اپنا مشکل راستہ کھول لیا ہے۔