سوئی میں نایاب نسل کے تیندوے کو ہلاک کردیا گیا

بلوچستان میں ڈیرہ بگٹی کے علاقے سوئی میں نایاب نسل کے تیندوے کو ہلاک کردیا گیا۔ 

ضلعی انتظامیہ ڈیرہ بگٹی کے مطابق نایاب نسل کے تیندوے کو ہلاک کرنےکا واقعہ سوئی کے پہاڑی علاقے میں پیش آیا جہاں مقامی افراد نے غار میں گھس کر نایاب نسل کے تیندوے کو فائرنگ کرکے مار دیا۔

مقامی افراد کا کہناتھاکہ تیندوا ان کے مویشیوں کو نقصان پہنچا رہا تھا اور مزید بھی نقصان کا خدشہ تھا تاہم تیندوے کو مارنے کے بعد مقامی افراد نے تیندوے کے ساتھ ویڈیو بھی بنوائی۔

ویڈیو میں مقامی افرادکو مارنے کے بعد تیندوے کو اٹھا کر لے جاتے ہوئے بھی دیکھا جا سکتا ہے۔

دوسری جانب ضلعی انتظامیہ کا کہنا ہے کہ تیندوے کو مارنے والے افراد کے خلاف ایف آئی آر درج کرکے تحقیقات شروع کردی گئی ہیں۔